Reportajen Estajiada Agustinha Amaral
Rádiu Komunidade Defisiénsia Timor-Leste (RKDTL) selebra nia aniversáriu ba dahuluk ho tema “Halekar lia-fuan difisiénsia iha ondas laloran.” Ba selebrasaun ne’e Diretora RKDTL husu governu apoiu ema ho difisiénsia hola knaar iha mundu jornalizmu.
Diretora rádiu KDTL, Ermerenciana Alves ba jornalista sira dehan “Objetivu aktividade aniversáriu ba loron ohin nian mak oinsá atu halibur fila-fali maluk sira ne’ebé husi organizasaun defisiénsia ida-idak. Hanesan ita hotu hatene ona katak tanba dala barak ne’e sira haluhan entaun ho ida ne’e ho aniversáriu ida ne’e, ami bele bolu sira mai hamutuk iha fatin ida ne’e atu nune’e ba futuru oin mai sira iha aktividade organizasaun, sira mos labele haluhan rádiu Komunidade Difisiénsia Timor-Leste.
Nia husu ba parte relevante atu apoia maluk difisiénsia sira iha mundu jornalizmu nian, “husu ba parte governu nomos organizasaun sira hotu, ba oin oinsá atu tulun mos rádiu RKDTL liu-liu aktividade sira ne’ebé mak ohin ha’u hato’o hela, iha faillansu hela labele husik rádiu RKDTL tenke tulun mos liu-liu ba difikuldade sira ne’ebé mak RKDTL hasoru,” nia dehan.
Iha fatin hanesan Sekretáriu Estadu SEKOMS Mericio Juvinal hetete governu liu husi MAPKOMS hakarak fasilita mak meius komunikasaun hotu-hotu, timoroan, liu-liu maluk difisiente sira bele asesu formasaun no hetan informasaun, nia dehan governu nia komitmentu atu fo asesu meius komunikasaun la’os konvensional hanesan rádiu no televizaun de’it maibé média dijital hotu hanesan, Instagram, Facebook, YouTube hirak ne’e tenke sai meius komunikasaun ba ema hotu inklui maluk difisiensia sira.
“Apoiu ba maluk difisiénsia sira ho kampña ou brosur ida ne’e no ha’u reprezenta governu husu ba maluk timoroan hotu, hahú agora ba oin ita tenki uza termu ida ne’ebé mak valoriza liu ba maluk difisiénsia sira hanesan termu ne’ebé mak ita uza hodi ko’alia ba maluk difisiénsia sira, difisiénsia matan, difisiénsia tilun, difisiénsia fíziku, difisiénsia ho saúde psikososial, difisiénsia intelektual. Termu sira ne’e mak ita sei uza hodi ko’alia ba maluk difisiénsia sira, no husu ba maluk sira hotu iha mundu ida ne’e, evita tiha lia-fuan ou termu sira hanesnan aat, tilun diuk, ain aat, bulak, bilan, maubeik, ita tenki evita,” Sekretáriu Estadu Mericio hatete.
Aktividade ida ne’e partisipa husi SEKOMS, MAPKOMS nomos organisaun difisiensia hanesan ADTL, RHTO ho partisipante sira seluk.
