Home Notisia AJTL nia Reprezentante Iha KI, Tenke Defende Liberdade Imprensa no Espresaun

AJTL nia Reprezentante Iha KI, Tenke Defende Liberdade Imprensa no Espresaun

280
0
Prezidente AJTL, Zevonia Vieira. [Foto: Santina Lucia da Costa | 05.07.2020]

Reportazen Santina Lucia da Costa

Asosiasaun Jornalista Timor Lorosa’e (AJTL) serbisu hamutuk ho Konselho Imprensa realiza konferensia AJTL nian, hodi hili nia membru AJTL ba tuir iha Konselho Imprensa ba periodu 2020-2024.

Liuhusi konferensia ne’e Prezidente AJTL, Zevonia Vieira, iha nia diskursu hateten, projetu  Lei  Kriminaliza  Defemasaun  sai  preokupasaun  boot ba ita hotu ne’ebe mak  serbisu  iha  mundu  jurnalismu, akademista no sosiadade sivil sira, tanba sei hamate ema nia Liberdade atu koalia, atu espresa hanoin  kritiku sira ba orgaun ka instituisaun sira ne’ebe mak karik la halo tuir promesa ne’ebe mak sira hato’o liu hosi kampanha eleitoral.

Prezidente AJTL afirma jornalista  sira  sei sai alvu ba iha Lei Kriminalizasaun  Defamasaun  tanba  jornalista  mak  sei transmite informasaun hosi fontes sira. Ita hatene katak  ita nia Liberdade imprensa no espresaun iha sudeste asiatiku  hetan  rangking 1 no iha mundial ita hetan numeru 78, ida ne’e imajen ne’ebe  mak diak tebes, tanba ita moris iha nasaun ne’ebe demokratiku, ho ita nia Konstituisaun RDTL ne’ebe mak diak, halo ita hetan ranking ne’ebe diak. Ita hotu espera ita nia rangking sei la monu tanba deit Lei Kriminalizasaun Defamasaun.

Ho nune’e liu hosi konferensia ida ne’e, “mai ita hanoin hamutuk hili figura ida ne’ebe mak bele reprezenta AJTL, jornalista tomak no ba ema hotu nebe defende direitus humanus, hodi lori ita nia aspirasaun ho brani no kontra Lei Kriminalizasaun Defamasaun no influensia politika. ne’ebe mak bele daet mai iha sala redasaun sira ou karik bele mos akontese iha Konselho Imprensa laran rasik. Tanba Lei Defamasaun no influensia politika mak dalan ida atu hamate liberdade imprensa no espresaun iha Timor-Leste no hau hatene katak ita hotu lakohi ida ne’e atu akontese”.

Foto Hamutuk ho Ministru Asuntu Parlamentares no KomSos iha konferensia AJTL. [Foto: Santina Lucia da Costa | 04.07.2020]

Prezidente AJTL deklara ita presiza figura ida ne’ebe mak bele reprenzenta ita hotu, iha abilidade no kapasidade, atu sai lideransa ne’ebe lori duni lian hosi jornalista, asosiasaun no lian direitus humanus nian.  Ita presiza figura ida ne’ebe mak bele iha vizaun ida, atu dezenvolve media iha Timor-Leste ne’ebe diak liutan, ita presiza figura ida ne’ebe mak bele ajuda jornalista sira iha kapasidade tekniku, ajuda jornalista sira sai kritiku liu, intelektual no professional,  bele lori AJTL nia ezinjensia ba iha Konselho Imprensa, hodi nune’e bele halo mundansa ne’ebe ita hotu hakarak atinji, katak Timor-Lese iha ona jornalista sira ne’ebe mak pronto atu compete ho nasaun dezenvolvidu sira seluk.

Prezidente AJTL akresenta presiza aprosima media nain sira, atu bele respeita sira nian jornalista, sira nia direitu nudar ema serbisu professional ida, jornalista sira laos sai atan ba kompania ne’ebe mak serbisu ba, tanba ho produtu hosi jornalista nian, mak halo kompania ka insitituisaun media nee sai konnesidu.

“AJTL presiza figura ida ne’ebe mak bele defende no proteje jornalista sira hosi violensia, ne’ebe akontese ba sira. Ita presiza figura ne’ebe mak bele aproxima orgaun sira hanesan seguransa no defeza, atu respeita serbisu jornalista nian, bainhira halo serbisu iha fatin publiku, tanba  realidade  hatudu  katak  iha  tinan hirak  liu  ba, iha jornalista balun mak sai  vitima tanba hetan baku hosi membru polisia balun, banhira sira halo kobertura”, hateten, Zevonia.

Zevonia hateten ema ne’ebe sei aprezenta konselho Imprensa hosi AJTL, nudar komunikador ne’ebe diak ba publiku, politiku nain sira hodi koalia asumtu jurnalismu nian, liu hosi media literacy ne’ebe organiza hosi Konselho Imprensa.

“Hamutuk ita kontinua hakilar ba Liberdade imprensa no espresaun. Kontinua hakilar kontra Projetu Lei Kriminalizasuan  Defamasaun  iha Timor-Leste, tanba  ita  lakohi  lia los atu mate”,  hateten Zevonia

LEAVE A REPLY

Please enter your comment!
Please enter your name here