Reportajen Joselina dos Santos
Sekretáriu ba Estadu Formsaun Profisional no Empregu (SEFOPE), liuhosi Diresaun Nasional Empregu Estranjeiru (DNEE), fó sai ona rezultadu Test Eskrita Lian Inglés ba Vaga Online Australia no sei la fó teste tan ba kandidatu sira ne’ebé valor prioridade kategoria Excelente, Diak Loos no Diak.
Diretór Jeral SEFOPE, Carlito Rosario Cabral hatete, husi rezultadu koresaun ne’ebé halo iha loron 3-9 fulan jullu 2024, ekipa DNEE hetan klasifikasaun iha teritoriu laran mak hanesan Total valor kandidatu Excelente hamutuk ema na’in 52, total valor Very Good hamutuk ema na’in 840, total valor Good hamutuk ema na’in 6921, total valor Sufisiente 8517, total valor Poor 18931, total valor Very Poor 6820, total Absent 8687, ba kandidatu sira ne’ebé la tuir test eskrita Sefope hasai ona naran husi sistema.
“Kandidatu sira ne’ebé ho valor sufisiente no la diak maibe tuir test eskrita Sefope nafatin konsidera no la hasai sira iha sistema, nune’e rekomenda kandidatu sira ne’ebé valor sufisiente no ladiak atu hadia sira-nia koñesimentu iha nivel lian inglés atu bele hetan portunidade ba servisu iha rai liur”, dehan Diretor Jeral Carlito Rosario Cabral iha Salaun Sefope Kaikoli, 17/07.
Sefope sei fó oportunidade ba kandidatu sira ne’ebé ho valor ladiak hodi tuir formasaun lian inglés iha kada munisipiu durante fulan tolu, kandidatu sira mos bele tuir kursu lian inglés iha formasaun seluk hodi aumenta sira-nia koñesimentu, bainhira formasaun ne’e hotu kandidatu sira bele mai aprezenta Sertifikadu lian inglés iha Sefope atu bele tama kategoria lian inglés iha nivel aas hodi bele iha oportunidade ba servisu iha rai liur, tanba Sefope rasik mak sei fó test entrevista ba kandidatu sira ne’ebé tuir formasaun no iha sertifikadu lian inglés.
“Informasaun detallu atu kandidatu ida-idak hatene nia valor no tama iha kategoria ida ne’ebé asesu liuhosi website no Facebook Sefope nian iha loron 19 Jullu 2024. Nune’e husu ba kandidatu sira mantein pozisaun karik iha informasaun liga ho rezultadu test eskrita bele mai konfirma Sefope liuhosi DNEE hodi klarifika loloos, laiha ajénsia ka pesoál ida mak liu Sefope hodi rekruta ema ba servisu iha rai liur tanba ne’e lalika fiar lia bosok ruma hodi fó osan. Sefope deit mak iha responsabilidade no autoriza hodi rekruta timor oan sira ba servisu iha rai liur, Sefope la fó autorizasaun ba ajénsia ida hodi rekruta traballadór sira ba servisu iha rai liur”, nia informa.
Sefope hamutuk Instituisaun CAC no PDHJ hodi halo koresaun ba materia test eskrita no foti desizaun katak kandidatu sira ne’ebé valor tama iha Excelente, Very Good no Good ne’e tama iha kategoria prioridade nune’e sei la halo test seluk tanba desizaun iha empregadór sira-nia liman. Karik iha empregadór sira husu kandidatu sira ne’e mak Sefope sei aprezenta.
