Home Notisia Lu Olo: Labele Nega Jerasaun Lider 1974 Sira Ne’ebe Hahu Mobiliza Povu...

Lu Olo: Labele Nega Jerasaun Lider 1974 Sira Ne’ebe Hahu Mobiliza Povu Ho Patria

1062
0
Lider istoriku Timor sira. [Foto: Copyright arkivu nasional | 28.08.2020]

Reportazen Zevonia Vieira

Hodi komemora loron Konsulta Popular 30 Agostu, ne’ebe mak determina referundu ba povu Timor, hodi manan vitoria ukun rasik-an, liu hosi mesajen Prezidente Republika, Dr. Francisco Guterres Lu Olo, hatoo katak hametin  neon no hakarak ida de’it hahú no haburas ho líder polítiku barani  sira iha 1974 hanesan Francisco Xavier do Amaral, Nicolau Lobato, Mari Alkatiri, José Ramos-Horta, Justino Mota, Francisco Borja da Costa, Vicente Sa’he, Mau Lear  no seluk- seluk tan, inklui lider-feto barani ida, Maria do Ceu Pereira/Bi Lear.

“Ita labele nega katak ho jerasaun luta lidera husi líder-sira ne’e, mak ita hahú mobiliza no organiza-an  nu’udar povu ho pátria ida de’it. Povu hadeer ba movimentu ukun rasik-an ho ASDT/FRETILIN”, hateten Lu Olo iha nia mesajen ba loron 30 Agostu, 28/08.

Lu Olo hatutan katak hanesan ne’e mak ita nia istória luta libertasaun nasional hahú iha ita-nia rai doben Timor-Leste. Ho invazaun Indonézia ita-nia sentidu povu no pátria, ita-nia unidade nasional haburas liután.

Prezidente Republika mos fo hanoin istoria importante katak FALINTIL nakfilak kedas ba liman kroat povu nian, husi 7 Dezembru 1975 loron invazaun Indonézia.

Iha bazes-de-apoiu ka zonas libertadas, diresaun luta FRETILIN no FALINTIL hametin liután nasionalismu no patriotismu ba ita-nia Povu.  Moris loron -loron nian la’o ho apoiu ba malu, iha zonas libertadas.

Eis gerrilleiru ida ne’e mos haktuir istoria pasadu katak iha operasaun serku no anikilamentu, ho bombardeamentu harahun bazes-de-apoiu hotu-hotu iha 1978.  Nicolau Lobato  mate iha kampu batalla iha 31 Dezembru 1978.

Ho patriotismu no nasionalismu maka’as husi bases-de-apoiu mak povu lori funu tun mai vila laran, nune’e hahú hametin no habelar frente klandestina.

Nia dehan sobrevivente sira buka malu no liu tiha tinan tolu, konsege tuur hamutuk iha Maubai, Viqueque hodi re-organiza luta,  biar iha mate laran, barak konsege hakaat  ba Maubai no halo Konferénsia Nasional iha 1981, lidera husi sobrevivente, membru Comité Central FRETILIN rua,  Komandante Xanana Gusmão no Ma’hunu.

Lu Olo hatutan husi 1981 ba oin, mosu hanoin ho estrutura foun atu hakoak liután ita-nia ema sira atu luta hamutuk. Mosu CRRN- Conselho Revolucionário da Resistência Nacional iha 1981,  CNRM– Conselho Nacional da Resistência Maubere, iha 1987 no CNRT – Conselho Nacional da Resistência Timorense iha 1998.

“Hafoin ita reorganiza-an iha 1981, rezisténsia iha rai-laran no iha rai-liur buka mos dalan hamutuk atu ita bele manán ukun –an. Husi 1982, DFSE / Delegasaun FRETILIN Servisu iha rai-li’ur, muda estratéjia no hahú halo servisu maka’as liu iha área direitus umanus ho objetivu nafatin ba ukun rasik-an”, dehan Lu Olo

Xefe Estadu ne’e haktuir iha 23 Marsu 1983, komandante Xanana Gusmão, nu’udar Prezidente Konsellu Revolusionariu Rezisténsia Nasional (CRRN), halo kontaktu dame ho Koronel Purwanto, iha Lariguto-Ossú, maibé militár Indonéziu barak la kumpre akordu dame.

Durante períodu dame militares Indonézius halo estratéjia alisiamentu ba gerrilleiru sira atu rende,  sira buka deteta redes klandestinas no buka konvense opiniaun públika Internasional ho propaganda katak sira halo ‘Pembangunan” iha Timor- Leste no  dehan FALINTIL  rende ona.

Nia dehan ikus mai, sira viola akordu dame, nune’e, akordu ne’e rompe e komandu FALINTIL ordena levantamentu armadu iha Krarás/Viqueque no iha fatin seluk.

Lu Olo haktuir tan katak iha duni tinan 1983, líder rezisténsia Kay Rala Xanana Gusmão konsege duni hato’o Plano de Paz ba Nasoins Unidas no husu referendu atu povu mak hili rasik ninia destinu.

Iha Fevereiru 1989 Bispu Dom Ximenes Belo hakerek ba Sekretáriu-Jeral Nasoins Unidas no husu mós referendu ba Timor-Leste.

Iha outubru 1989, Amu Papa João Paulo Segundu joãopjojoJjoJ vizita Timor-Leste. Ita-nia joven sira, ho brane no determinasaun, halo manifestasaun hafoin missa. Media internasional fó-sai ba mundu katak povu Timor-Leste hakarak ukun rasik-an.

Masakre Santa Cruz iha 12 Novembru 1991 haboot liután solidariedade internasional. Forsa Indonézia kaer dirijente tolu importante hanesan Vise-Sekretáriu Komisaun Diretiva FRETILIN, Ma’hodu, iha 23 janeiru 1992.  Iha 20 novembru   1992, forsa indonezia sira kaer mós, líder rezisténsia Kay Rala Xanana Gusmão no kondena tuir lei indonézia nian. Iha 5 abril 1993, sira kaer tan líder rezisténsia Ma’huno.

Lu Olo hateten biar nune’e FALINTIL iha ai-laran la rende ba Indonézia! Nino Konis Santana, Sekretáriu Komisaun Diretiva FRETILIN hamriik kedas nu’udar Chefe do Conselho Executivo da Luta hodi kumpre palavra de orden “a Luta Continua”. Ikusmai hatutan husi  Vice-Comandante-em-Chefe FALINTIL, Taur Matan Ruak.

Iha tinan 1996, Bispu Dom Carlos Filipe Ximenes Belo no José Ramos- Horta simu prémiu Nobel da Paz nu’udar rekoñesimentu husi komunidade internasional ba sira-nia kontribuisaun ba harii paz, iha ita-nia rai doben.

Estudante timoroan lori ita-nia luta ba Indonézia laran ho apoiu husi belun indonéziu sira. Krize iha Ázia akontese no movimentu pro-demokrasia mosu iha Indonézia laran hodi hamonu rejime Suharto.

Prezidente haktuir tan istoria importante sira liu hosi nia mesajen ofisial katak iha tempu ne’eba Portugal halo negosiasaun ho Indonézia ho supervizaun Nasoins Unidas iha 5 maiu 1998 no Prezidente Habibie hatán halo referendu hodi hakotu konflitu iha Timor-Leste.

“Iha 30 Agostu 1999, ita deside lakohi autonomia espesial ho Indonézia tanba ukun rasik-an mak dalan loos liu ba ita  nu’udar povu no nasaun. Ha’u hatete fila fali. Referendu ne’e akontese nu’udar rezultadu husi ita-nia luta rasik, ho brane no determinasaun”, hateten Lu Olo

Lu Olo hateten ita-nia lideransa luta husu referendu husi kedas 1983. Pedidu sira ne’ebé tama iha FRETILIN ninia Planu Paz 1983, akontese duni iha 1999.

“Ita mós hakarak hakotu konflitu ho Indonézia maibé ita lakohi lakon ita-nia direitu atu ukun-an. Se ita la halo luta libertasaun nasional, se komunidade Internasional la rekoñese luta no la halo presaun, ONU mós la mai halo referendu”, tenik Lu Olo

Nia dehan brani kaer luta  iha rai-laran no iha rai-li’ur, ho apoiu husi ita-nia belun sira, nu’udar Governu, Organizasaun Solidariedade ka husi ema ida-idak, iha mundu tomak, mak ita konsege hala’o ita-nia direitu ba auto-determinasaun no independénsia, iha 30 agostu 1999.

Print Friendly, PDF & Email

LEAVE A REPLY

Please enter your comment!
Please enter your name here