Reportajen David Da Costa
Prezidente Repúblika, Dr. José Ramos-Horta lamenta ho invazaun hosi apoiante eis Prezidente Repúblika Federativa Brasil, Jair Bolsonaro bá Kongressu Nasionál, Supermu Tribunál no Palásiu Planalto iha Brazilia.
“Ho preokupasaun no konsternasaun klean, toma nota, eventu barbaru, assaltu violentu ba instituisaun demokrátika Brazileira, hosi apoiante eis Prezidente Bolsonaro ne’ebé dadaun ne’e sai refujiadu iha Estadus Unidus,” hatetn Xefe Estadu, relasiona ho situasaun polítika iha Brazil, iha komunikadu imprensa ne’ebé Neon Metin asesu husi Palásiu Prezidensiál Bairo-Pite, Segunda 09/01.
Asaun ne’e, tuir Xefe Estadu, hanesan mós invazaun apoiante hosi eis Prezidente Estadus Unidus Amérika, Donald Trump bá Capitolio iha fulan Janeiru tinan 2021, tanba la konkorda ho rezultadu eleisaun ne’ebé fó vitória ba atuál Prezidente Estadus Unidus, Joe Biden.
“Fó lembra katak, assaltu ne’ebé organiza husi eis Prezidente Donald Trump, bá instituisaun aas liu simbólika no demokrasia Brazileira, kongressu amerikanu ne’ebé ha’u pessoalmente koñese di’ak liu, iha tinan barak nia laran, ba servisu no moris ho instituisaun amerikana antiga ne’e, hanesan “copy paste” bá saida mak akontese iha Washington, Estadus Unidos Amérika husi Apoiante eis Prezidente Bolsonaro ne’ebé ho konsidénsia iha hela Florida, Estadus Unidus,” tenik Prezidente Repúblika.
Ba Premiadu Nobel da Páz ne’e, asaun violenta ne’ebé akontese iha Brasil, ema hotu tenke kondena no rejeita.
“Ne’e aktu gravidade extrema, ne’ebé ita hotu, nasaun CPLP, Uniaun Europeia, nasaun demokrátiku hotu iha mundu, Nasoes Unidas no ida hotu, tenke rejeita totalmente, kondena maka’as,” afirma Xefe Estadu.
Entretantu, Prezidente Repúblika, José Ramos-Horta partisipa iha serimónia tomada de posse ba Prezidente Luís Inácio Lula da Silva iha loron 1 fulan Janeiru tinan ne’e iha Brazilia.
