Home Memoria Porto Dili Sai Fatin Memorial Ba 7 Dezembro 1975, Dignifika Luta Nain...

Porto Dili Sai Fatin Memorial Ba 7 Dezembro 1975, Dignifika Luta Nain Sira Ne’ebe Mate

825
0
Loron Memoria 7 Dezembro. [Foto: Copyright Media PR | 08.12.2020]

Reportazen Marcio Morato Pinto

Estado Timor deside Porto Dili sai nudar fatin istoriku ba memoria Invasaun 7 de Dezembro 1975 Indonesia mai iha Timor. Iha loron nasional Memoria ne’e, Centro Nasional Chega! (CNC) ne’ebe lansa mos plaka memorial 7 Dezembru 1975, hodi dignifika no hatudu solidariedade ba sobrevivente sira, ne’ebe fo ona sira nia moris hodi fakar ran ba libertasaun patria no povu.

Iha lansamentu plaka memorial, Xefe Casa Civil Presidensia, Francisco Maria de Vasconcelos lee mesajem hosi Prezidente Republika ba komemorasaun loron Invasaun 7 Dezembro ba dala 45 katak ho memoria ida ne’e estado Timor-Leste hakarak dignifika maluk luta nain sira, ne’ebe mate iha loron Invasaun no hasae mos solidariedade hodi fó ksolok ba familia sira ne’ebe lakon ema hosi uma laran, liuliu ba oan kiak sira ne’ebe sei moris.

“7 de Dezembro nudar loron memoria nian ne’ebe konsagra liu hosi Lei No 3/2016 25 de Maio, ita hakruk ba Heroina no Heroi sira hutu ne’ebe restos mortais halot ona iha Jardim dos Herois da Patria no ita seidauk hetan too ohin loron, ida-idak ho nia historia no experiensia rasik, hosi sira ida-idak ita aprende oinsa moris nudar Timor oan hatene hadomi povo no Patria ba sira nia memoria ita hutu hakruk”, haktuir Francisco Vasconcelos hosi mensajem Presidente Republika nian ba iha loron komemorasaun Invasaun ne’ebe halao iha fatin Memorial Ponte Kais Dili, 07/12.

Mensajem Presidente nian mos hateten katak memorial ida ne’e halo parte iha programa memorializasaun CNC nian, ho mandatu hatur ho dekretu lei 48/2016 no fatin ida ne’e sei tama iha roteio turismo historiku rai laran nian, ho objetivu atu vijitantes sira hatene no konhese historia Luta ukun rasik an Timor nian, lori gerasaun timor-oan nian hutu hare ba kotuk hodi valoriza ema sira ne’ebe fakar ran iha fatin hutu hutu durante tinan 24. 

“Ohin Estado nia rekonhesimentu la halai de’it ba sira ne’ebe fakar ran, tamba hakuak movimentu libertasaun nasional maibé hakuak mos ba maluk sira seluk ne’ebe hetan tiru no mate iha loron 4 nia laran no hafoin loron Invasaun Indonezia”, haktuir Francisco iha mensajem Presidente nian.

Iha fatin hanesan Diretor Ezekutivu CNC, Hugo Fernandes hateten CNC halo ona mapamento ba fatin istoriku sira ne’ebe iha, ho objetivu atu identifika no harii netik forma ruma ba memorializasaun fatin sira,  nudar fatin hodi harii no hametin konsiensia no nudar fatin destinasaun turistiku, liu-liu turismu istoriku.  

Nia informa iha tinan 2017, Primeiru Ministru, Dr. Mari Alkatiri iha altura ne’eba lansa ona programa Dili sidade istoriku, no CNC halo mapamentu fatin istoriku iha Dili kuase 30 resin, ho mapamentu ne’ebe iha neneik ba bebeik, ita hakarak harii sira sai hanesan fatin Memorial.

Ho nune’e iha 2018, Presidente da Republika hanaran fatin ida ne’e nudar fatin Memorial ba 07 de Dezembro 1975, maibé tamba orsamentu no desenha hotu entaun iha 2019, Presidente Republika assina plaka no CNC promete katak iha tinan 45 komemorasaun Invasaun nian, sei harii memorial iha fatin istoriku ida ne’e.

Iha entrevista ketak ho jornalista Neon Metin, Diretor Exekutivu CNC hateten objetivu hosi Memorial ida ne’e atu dignifika no fó hondra ba maluk sira ne’ebe fó an ba mate no fó sai ba publiku, atu rekonnese sira no hatene katak ema hira maka mate, liuliu iha loron Invasaun Indonesia nian mai iha Timor.

“Relatorio Chega temi ema sira ne’e nia naran, maibe iha ema ne’ebe la konsege assesu ba relatorio ne’e la konsege lee, entaun ita tau iha memorial ne’e ema sira ne’ebe mate iha loron 7 to’o loron 10 no mos ba sira ne’ebe mate durante Fulan Dezembro nia laran, no ita iha regista hosi CHVR barak ne’ebe maka mate iha ne’e, hanesan saudoza Isabel Lobatu, Borja da Costa no sira ne’ebe ema oho iha Porto Dili, balu iha Toko Lay nian, balu mate iha UNTL Kaikoli no mos iha fatin barak”, dehan Hugo ba Neon Metin.

Iha biban ida ne’e, Xefe Casa Civil Presidensia mos hato’o mesajem hosi Presidente da Republika nian katak Lansamentu Memorial 7 de Dezembro 1975 Invasaun Indonezia mai iha Timor, atu hatudu ba vijitantes sira katak solidariedade entre ema sei laiha fronteira atu haketak katak belun estranjeiro sira mos kahur sira nia ran no Timor sira nia ran durante iha prosesu luta ba libertasaun nasional no sira nia memoria sei hela ba nafatin.

Print Friendly, PDF & Email

LEAVE A REPLY

Please enter your comment!
Please enter your name here