Home Notisia Fo Pose Ba Embaixador/a nain 5, PR: Diplomasia Ekonómika Sai Prioridade Ba...

Fo Pose Ba Embaixador/a nain 5, PR: Diplomasia Ekonómika Sai Prioridade Ba Estadu

1812
0
PR Fo pose embaixador/a sira. [Foto: Media PR | 13.07.2021]

Reportajen Santina Lucia da Costa

Prezidente Repúblika, Dr. Francisco Guterres Lu-Olo fó posse ba Embaixadór foun na’in lima, iha Palásiu Prezidensiál. Liu husi diskursu Prezidente Repúblika hateten diplomasia hanesan arte ida iha relasaun entre Estadu sira no riin importante ida ne’ebé tanen komunidade internasionál atu buras beibeik.

Xefe Estadu haktuir iha ámbitu diplomasia, diplomasia ekonómika sai prioridade ida ba ita-nia Estadu. Kestaun investimentu, relasaun komersiál no kooperasaun manán importánsia babeibeik iha knaar diplomátiku ha progresu nasaun sira-nian, liuhusi kaer metin kualidade no relasaun ckonómika multilateral ne’ebé tau hamutuk

Lu-Olo hatutan ohin loron diplomasia ekonómika iha relasaun ho mós saude publika iha mundu nu’udar konsekuénsia direta husi pandemia COVID-19. Ohin loron relasaun ekonómika, komersiál no kooperasaun internasionál tenke konsidera mós protesaun saúde sidadaun sira nian no komunidade sira nian iha mundu tomak.

Prezidente Repúblika dehan diplomasia tenke konsidera mós oinsá hala’o prátika ekonómika sosiu-kulturál sira, entre pais sira ho ligasaun ba malu, koordena malu no hamutuk.

Lu-Olo, afirma fila-fali “hau-nia fiar metin katak iha mundu ida ne’ebé fronteira nakadoko no ameasa mosu hela de’it iha fatin oioin, diálogu, servisu hamutuk no apoia malu mak sei leno dalan ba atividade diplomátika Estadu Timor-Leste nian. Ita-nia diplomasia hatuur ho prinsipiu no métodu sira ne’e.”

 “Hau aproveita mós momentu ida ne’e hodi fo-hatene katak, bainhira presiza buat ruma, ha’u prontu atu apoia no asiste señora no señor embaixador. Hau’ dezeja susesu boot ba ida-idak ne’ebé simu misaun ne’ebé ami fő fiar ba.”tenik, Lu-Olo iha palasiu Prezidensial Nicolau-Lobato, Bairu-Pite, 13/7.

Iha fatin hanesan, Vise-Ministru Negósiu Estranjeiru no Kooperasaun (Vise-MNEK), Julião da Silva hateten Prezidente Repúblika fó posse ba Embaixadora ho embaixadór sira, fó posse hahú na’in 5, sei iha na’in 10 resin ne’ebé iha tempu badak sei simu tan posse ba segundu etapa nian.

“Serbisu xefe misaun sira iha Nasoins lubuk ida ke sira nia misaun remata ona kuaze balun remata ona tinan no balun remata ona fulan 6, entaun mundu infrenta situasaun global pandemia inklui nasaun Timor-Leste, iha hela estadu emerjensia entaun prejudika ba sira nia viajen husi sira nia fatin serbisu atu mai, tanba ne’e ita extende sira nia kontratu no iha nasaun balun sira loke dadaun ona sira nia vou de viajen aviaun nian, tanba ne’e mak ita hahu Prezidente Republika fó posse ba embaixadores na’in 5.” Hateten, Vise-Ministru Negosius Estranjeirus no Kooperasaun (Vise-MNEK), Julião da Silva.

Nia dehan normalmente sira na’in lima ne’e ba hala’o nia misaun durante tinan 3, se dezempeñu di’ak sei bele kontinua.

Entretantu Embaixadora ba Nova Zelandia, Felicidade Guterres hateten sente agradese tebes, bele hetan konfiansa husi Prezidente Repúblika Dr. Francisco Guterres Lu-Olo, Governu ho Ministeriu Negosiu  Estranjeiru no Kooperasaun, tanba asume knaar ida ne’e ba dala rua.

“Hau sente agredesida tebes tanba bele hetan konfiansa atu asumi knar hanesan embaixadora ba dala rua agora, tanba uluk iha Kamboja hau fila-fali mai tinan ida ho balun ona, no agora hau asumi knar hanesan embaixadora ba Nova Zelandia.” Hateten aktual Embaixadora ba Nova Zelandia, Felicidade Guterres hafoin simu tiha posse.

Felicidade Guterres iha E=esperansa katak agora ba oin, iha buat barak mak ita esplora iha ne’eba, iha mós turizmu,  hanesan kriasaun de animais mós iha, buat barak mak sei esplora,

“Hau la bele promete uluk lai maibé sei ba haree para explora, kooperasaun saida mak ita sei tuir mai, maibé agora dadaun sira fó bolsu estudus ba ita nia Timoroan sira, nune’e mos sempre apoiu mai ita iha saude,defeza no polisia.” hateten Felicidade Guterres.

Embaixadores sira ne’ebé mak hetan nomeasaun atu ba reprezenta Estadu Timor-Leste ne’ebé  simu posse husi Prezidente Republika Dr. Francisco Guterres Lu-Olo mak hanesan, Karlito Nunes ba Reprezentante Permanente RDTL Junto organizasaun Nasoens Unidas (UN) ho Nova Iorque, Abel Guterres embaixador designadu husi Timor-Leste ba Bruney Darusalam, Felicidade Guterres embaixadora designadu Timor-Leste ba Nova Zelandia, ,Eusébio Corsino designadu husi Timor-Leste ba Republika Cuba, Adão Soares Barbosa, enviado especial ho kategoria embaixador Itinerante ba asuntus klimatikus.

Print Friendly, PDF & Email

LEAVE A REPLY

Please enter your comment!
Please enter your name here