Reportajen Joselina dos Santos
Autoridade Protesaun Sivil (APS), liu husi Diretór Gabinete Relasaun Externa no Komunikasaun (GREK) Anacleto Caetano akompana husi Adjuntu Operasionál Aero APC, Mariano Ana Lopes no Adjuntu Operasional Marítima APC, Serafim da Costa informa katak dezastre ne’ebe akontese husi loron 20 fulan Dezembru 2022 to’o loron 3 Janeiru 2023, ne’ebe estraga komunidade nia uma hamutuk 223 iha Territóriu laran.
Diretór Gabinete Relasaun Externa no Komunikasaun (GREK), Anacleto Caetano hateten impaktu husi dezastre ne’ebé akontese, estraga komunidade nia uma lubuk ida hamutuk 127, no iha semana Ida ne’e kontinua akontese estragus tan komunidade nia uma entaun totál hamutuk 223, tanba udan no anin boot iha Munisipiu Ainaro, Bobonaro, Lautem, Likisa Mantuto, Manufahi no Viqueque.
“Ami hato’o ba publiku katak komunidade nia uma ne’ebe hetan estragus hamutuk 223, tanba dezastre naturais, tuir Diresaun Nasional metrolojia katak ba oin posibilidade sei akontese tan udan no anin boot, nune’e husu ba komunidade bainhira hala’o atividade tenke matan moris neon na’in no kuidadu-an atu antisipa antes”, Dehan, Diretór Gabinete Relasaun Externa no Komunikasaun (GREK) Anacleto Caetano, liu husi Konferensia Imprensa, iha Salaun Reuniaun APS Kaikoli, 09/01.
Nia hatutan depois akontesimentu iha etapa dahuluk, APS iha Komandu Munisipál, sira imediata kedas no fó apoiu emerjénsia ba komunidade ne’ebe afeta ba dezastre naturais iha kada Munisipiu, etapa daruak ne’e APS halo verifikasaun ba komunidade nia uma katak sira nia uma ne’e tama iha kategoria ida ne’ebe, aat naton ka aat kaman atu nune’e APS bele fó apoiu rekoperasaun liga ba ema nia vida iha momentu akontese.
Nia relata Komandu Munisipal iha Autoridade Protesaun Sivil to’o kedas iha fatin akontesimentu hodi fó apoiu emerjénsia liu-liu ba kondisaun vitima sira nian, maske seidauk halo verifikasaun depois mak halo kontrusaun ba komunidade sira nia uma no eskola ka kapela ruma ne’ebe hetan estragus.
