Reportajen Umbelina dos Reis
Sekretáriu Estadu Formasaun Profesional no Empregu (SEFOPE), ho Centro Nasional Chega (CNC!), selebra nota de entendimentu atu servisu hamutuk hodi tau matan ba sobrevivente nia oan sira ne’ebé durante ne’e la asesu ba formasaun.
Iha serimónia ne’e, Diretór Ezekutivu CNC!, Hugo Maria Fernandes hatete, governu fo apoiu ba sobrevivente husi funu na’in nia oan sira, liu-liu sobrevivente sira ne’ebé mate ona maibé nia oan sira ne’ebé mak seidauk hetan apoiu husi estadu, entaun sira mos tenke hetan apoiu ida ne’e.
Nia dehan, bazeia ba rekomendasaun CNC!, sira hato’o proposta ba SEFOPE hodi selebra akordu, nune’e bele implementa programa konaba formasaun nian. “Programa ne’ebé durante ne’e ami fiar, hetan husi SEFOPE primeiru mak konabá formasaun iha área oi-oin, ho Sentru formasaun ne’ebé mak SEFOPE iha, sei tulun sobrevivente no vítima sira husi funu na’in nia oan ka jerasaun foun, sira bele hetan formasaun iha tékniku oi-oin,” dehan Diretor Hugo.
Nia akresenta, segundu sira bele hetan oportunidade nomos orienta sira ba servisu ka formasaun sira ne’e, nia fiar katak sira nia koñesimentu di’ak hodi kontribui ba rekursu umanu Timor-Leste nian, nune’e bele hetan servisu iha rai li’ur no rai laran. Alende ne’e mos CNC! iha tinan kotuk harii Uma Memória Esperansa 10 ba sobrevivente sira. Tinan ida nee mos harii tan uma 5, depois sei iha programa tuir mai, nia dehan, konabá finanseiru CNC! ho SEFOPE aloka rasik orsamentu ho sira nia rekursu ne’ebé iha hodi realiza aktividade ne’e.
Iha fatin hanesan Sekretáriu Estadu SEFOPE, Alarico do Rosario hateten, bainhira CNC! halo konfirmasaun entre parte rua, haree katak CNC! ne’e parte hosi governu maibé iha programa importante balu ne’ebé liga ho formasaun no auto-empregu, nune’e loke formasaun hodi promove ema ne’ebé sira nia badaen no matenek atu bele promove ba futuru nasaun nian. “SEFOPE nia papel importante liu mak haree ba formasaun, área trabalu no saída mak atu halo hodi prepara ba ema sira ne’ebé atu servisu iha rai laran no rai li’ur, husu ba joven sira, tempu agora joven sira tenki aprende hodi hatene konabá saída mak merkadu rai laran no merkadu rai li’ur,” nia enkoraja.
Nia husu ba formador sira atu fasilita formasaun ba formanadu sira ho di’ak hodi prepara no promove ba futuru nasaun nian hodi dezenvolve rai doben Timor-Leste.
“Asina akordu ohin, pasu primeiru entre CNC! ho SEFOPE hare ba futuru sei servisu hamutuk ho sobrevivente nia oan sira ne’ebé husik hela, ne’ebé durante ne’e ladun asesu ba formasaun, oinsá tau atensaun ba sira nia direitu atu ba servisu iha rai laran no rai li’ur, tanba mundu agora ema presija saída mak ita hatene, no saída mak ita bele halo? Ema la husu dehan o nia matenek ne’e saida? Nune’e papel importante tenki tuir formasaun hodi aprende no prepara aan ba futuru,” Sekretária Estadu Alarico enkoraja tan.