Reportajen Estajiada Agustinha Amaral
Bee Timor-Leste (BTL) E.P, asina kontratu ho kompañia JEPANO, Unip.Lda, ba melloramentu sistema bee mos durante fulan neen nia laran iha Munisípiu Covalima, Postu administrativu Suai Vila, ba Suku Suai Loro, Camanasa no Debos ho benefisiáriu komunidade 1500 ital.
Iha serimónia ne’e, Prezidente BTL, Carlos Peloi dos Reis, hatete, ohin asina kontratu refere bazeia ba orsamentu ne’ebé mai husi governu rasik no aloka direita ba BTL. Nia dehan, kuaze projetu hotu orsamentu hosi governu. Iha tinan kotuk governu apoiu 36 millões resin no tinan ne’e 18 millões i tal. Osan sira ne’e mak uza hodi halo operasaun no manuntensaun sistema bee mos inklui promove projetu iha área rural no Postu sira. Nia akresenta, iha ona projetu foun 26 mak implementa iha kapital, 11 iha postu no 14 sei iha prosesu aprovizionamentu.
“Projetu ida ne’e hanesan kontinuasaun husi projetu perfurasaun ida ne’ebé ita halo ona no iha mos posu rua agora ne’e hahú halo kanalizasaun ba komunidade sira iha fatin refere,” dehan Prezidente Carlos ba jornalista sira iha Salaun BTL, Caicoli, Segunda-feria, 5/12.
Prezidente BTL ne’e hatutan, sira sei promove projetu foun iha komunidade sira ne’ebé seidauk asesu ba bee mos tanba ne’e sira sei esforsu aan halo jestaun ba komunidade ne’ebé asesu ona bee mos no kontinua promove projetu sira iha fati-fatin atu komunidade sira asesu ba bee moos.
Nia dehan, sira mos lansa tan projetu foun ida Postu administrativu Fatuc-Lulic, iha Fatumea foin halo levantamentu de dadus, enkuantu Tilomar halo hela perfurasaun ba bee mos, haree ba perfurasaun di’ak hafoin kontinua ba prosesu kanalizasaun, prosesu hirak ne’e sei halo fazeadamente, nune’e bele lori bee ba komunidade sira iha área urbanu, sentru munisípiu no postu nian.
Iha fatin hanesan Diretora kompañia JEPANO, Delfina Amaral Lopes, hato’o, kontratu ida ne’e halo, kompañia prontu finaliza tuir kuantidade no durasaun ne’ebé kontrata hodi halo kanalizasaun ba bee mos iha Suku tolu, Suai Vila nian.
“Tanba ne’e ohin ita asina ona kontratu, ne’ebé empreja prontu ona atu la’o no ita sei la determina loron i data, maibé hakarak lakohi iha tempu badak kompañia tenki hala’o servisu refere para atu bele finaliza tuir tempu ne’ebé define. Problema ne’ebé kompañia atu implementa kedas mak, sasan kompañia atu implementa mak tenki la’o tuir desijaun, tenki garante kualidade,” dehan Diretora Delfina.
Diretora ne’e dehan, projetu ida ne’e implementa iha sira nia munisípiu rasik, tanba ne’e sira sei rekruta traballador iha suku ne’ebé implementa projetu refere.
