Reportajen Umbelina dos Reis
Deputadu Bankada Partidu Libertasaun Popular (PLP), Noe da Silva Ximenes, krítika Konsellu Veteranu, tanba veteranu sira tun direita, hodi mete iha Partidu Polítiku. Nia dehan veteranu ne’e hanesan ai-riin ba estadu, maibé iha polítika sira uza oportunidade veteranu nian, hodi politiza ba sira nia interese polítiku.
Deputadu Noe da Silva Ximenes husu ba Ministériu Kombatente Libertasaun Nasionál (MKLN), tau atensaun ba konsellu veteranu sira, tanba intensaun harii konsellu veteranu ne’e, atu haree ba situasaun jerál la’os sai fali knuuk ba partidu, satan Prezidente Konsellu Veteranu sira mak tuun direita halo polítiku ba partidu.
“Ha’u la komprende veteranu ne’e pertense ba ema ida de’it ka nasaun tomak nian. Será ke Taur Matan Ruak ou ukun na’in agora da-daun sira ne’e la’os veteranu no la pertense ba estadu, ita presija tenki politiza situasaun ne’e ba seriu, tenki tau atensaun maximu ba situasaun ida ne’e, nune’e ba oin ema labele utiliza veteranu hanesan instrumentu tanba intensaun harii konsellu veteranu ne’e konsolida oinsá atu hare ba situasaun veteranu no funu na’in sira hotu, la’os ba partidu ida de’it no veteranu ida de’it”, Nia dehan iha Plenária Uma-Fukun Parlamentu Nasionál, Segunda-feira, 20/02.
Nia dehan, veteranu hotu ne’ebé sei moris hotu-hotu halo funu, hotu-hotu fó kontribuisaun direita ba luta libertasaun povu no nasaun, tanba nasaun ne’e la’os ema ida nia kusta mesak, maibé nasaun ne’e ema hotu nian.
Iha fatin hanesan, Ministru Asuntu Parlamentár no Komunikasaun Sosiál, Francisco Martins Jerónimo, hatan deputadu sira nia intervensaun konaba veteranu sira ne’ebé mete partidu polítiku katak sei rejista hirak ne’ebé mete partidu polítiku hodi haruka ba Ministru Kombatente Libertasaun Nasionál no Primeiru Ministru, nune’e fó atensaun ba konsellu veteranu sira, tanba hili sira atu haree veteranu la’os hili para atu ba halo kampaña partidu polítiku sira.
Maibé governante ne’e mós informa katak, ema hotu-hotu servisu tuir oráriu, segunda to’o sexta ho oras servisu tuku 08:00 dader to’o tuku 05:00 loraik, fora hosi ne’e ema hotu iha direitu hala’o servisu ba ida-idak nia partidu polítiku.