Reportajen Joselina dos Santos
Eskola Filiar Báziku, (EFB) iha Suku Kamea Rai-Hun Postu Administrativu Cristu Rei, Munispiu Díli ne’ebe to’o agora sei menus fasilidade meza kadeira ba professores sira, Governu liuhosi Ministeriu Edukasaun Juventude Desportu (MEJD), husu ba professores estudantes no komunidade sira atu kuidadu eskola, mesmu fasilidade seidauk to’o tanba governu nia planu sei kontinua la’o hodi tau matan ba eskola ne’ebé menus fasilidade.
Koordenadora Eskola Fillar Báziku (EBF), 1 no 2 Camea Rai-Hun Bekora, Agustinha de Fatima Gusmão haktuir eskola ne’e harii iha tinan 1984, maibé to’o agora estudante sira nafatin halerik ba Fasilidade hanesan meza no kadeira inklui professores sira nune’e husu ba MEJD atu tau atensaun lalais tanba la seguru ba estudante sira.
“Meza no kadeira ba ami de’it susar ona sa’e tan ba estudante sira, eskola ne’e iha tiha Munisipiu Díli mak hanesan ne’e, oinsá eskola sira iha Munisipiu área rural, labarik barak mak hakarak aprende maibé ho fasilidade ne’ebe menus halo estudante sira baruk atu tuir aula entaun ita labele fó sala ba labarik sira tanba ne’e mak realidade”, dehan Kordenadora Eskola Fillar Bázika 1 no 2 Camea Rai-Hun, Becora, Agustinha ba Neon Metin iha nia knaar fatin EFB Camea, sexta 10/02.
Nia hatutan, eskola ne’e kleur ona entaun fasilidade hirak ne’e kontinua aat ba beik-beik, no kada tinan numeru estudante mos aumenta aas, entaun governu tenke iha estratejia di’ak ida atu bele atende ba problema hirak ne’ebe estudante sira hasoru, governu labele koalia iha ibun de’it maibé laiha pratika, nune’e ezije nafatin atu nune’e tau matan ba eskola ne’e tanba estudante mak futuru ba nasaun nian entaun tenke tau importansia ba labarik sira nia estudu.
Iha fatin hanesan, reprezentante inan husi estudante Eskola EFB Camea Rai-Hun, Lucia Fatima Vieira hateten, hanesan inan ba estudante senti la satisfas ba situasaun ne’ebe oan sira hasoru tanba eskola kondisaun aat no menus fasilidade ho situasaun ne’e inan labele husik labarik la’o mesak inan idak-idak tenke mai hein nia ona tanba tauk derepente udan ka anin boot bele fó impaktu ba labarik sira nia moris, nomós ba fasilidade la to’o entaun labarik sira dalaruma lakoi tuir aula no bolos barak entaun tenke akompaña sira to’o sai.
“Nune’e, ha’u husu ba governu liu-liu ba Ministeriu edukasaun Juventude Desportu, atu tau matan netik ba eskola ida ne’e, atu ami sente katak oan sira bele hala’o sira nia estudu ho di’ak no laiha impaktu ba sira estudu atu iha futuru sai diak liu tan”, Nia husu.
Relasiona ba problema ne’e, Neon Metin konfirma ho Diretór Jeral Ministru Edukasaun Juventude Desportu (MEJD), Antonino Pires katak eskola iha Timor laran ne’e, barak husi pre-escolar, ensinu baziku no sekundária hamutuk kuaze 400 mill resin iha territóriu Timor laran.
“Entre eskola sira ne’e, iha edifisiu balun ne’ebe ho kondisaun aat hanesan eskola Camea Rai-Hun ne’ebe nia plafond sira aat, no mos menus fasilidade kadeira meza, kada tinan governu sempre iha planu ba eskola sira hanesan ne’e maibé seidauk to’o tanba kada tinan numeru estudante sempre aumenta, tantu ba Pre-eskolar Ensinu báziku to’o Ensinu Sekundária sira”, dehan, Diretór Jeral (MEJD), Antonino Pires.
Nia haktuir, kada tinan sira tenke halo planu, atu oinsa bele produz kadeira sira ne’e, tuir evaluasaun ne’ebe iha no eskola basika Camea Rai-Hun nian tama ona ba iha lista, hodi hetan mos kadeira no meza sira ne’ebe tuir lista ne’ebe Ministériu Edukasaun Juventude Desportu nian. Governu iha tinan 4-5 liu ba produz ona 100 mill jogus rihun atus ida resin kadeiras hodi fahe ba eskola sira maibé seidauk to’o eskola refere.
“Nune’e ha’u husu ba professores estudante no komunidade sira ne’ebe hela besik eskola, tenke kuidadu eskola hanesan sira ni’an laos hanesan ema seluk nian, atu nune’e fasilidade ne’ebe estadu tau ne’e labele estraga, mesmu fasilidade ne’e seidauk to’o maibé planu governu nian katak kada tinan nafatin la’o”, nia husu.
