Home Notisia Media RENETIL-Neon Metin Hetan Apoiu Ekipamentu Multimedia Hosi Fundu SASCAS, Apoiu Ba...

Media RENETIL-Neon Metin Hetan Apoiu Ekipamentu Multimedia Hosi Fundu SASCAS, Apoiu Ba Servisu Advokasia

408
0
ekipa SASCAS, RENETIL no Neon Metin iha seremonia entrega ekipamentu. [Foto: Adroaldo | 20.02.2023]

Reportajen Adroaldo “Saretukau”

Organizasaun Resistência Nacional dos Estudantes de Timor-Leste (RENETIL) ofisialmente entrega ekipamentus multimedia etapa daruak nian ba nia Media Neon Metin, ne’ebé hetan akompañamentu direita hosi ekipa Serviço de Apoio ao Sociedade Civil e Auditório Social (SASCAS), ne’ebé apoiu fundu ba sosa ekipamentu refere.

Sasan multimedia hirak ne’e mak hanesan, Kamera Sony ida, Drone Set rua no Mikrofone set ida. Ekipamentu hirak ne’e hatama hosi Kompañia Kuruorasa Unipessoal, Lda, ba Organizasaun RENETIL hafoin entra hikas ba nia media Neon Metin. Apoiu fundu ba ekipamentu hirak ne’e ho total US $12,350.00, hosi fundu de apoiu SASCAS.

Iha serimónia de entrega ne’ebé hala’o iha Sede RENETIL, Segunda-feira (20/02), reprezentante Primeiru Vise sesante RENETIL, Franciscos J. M. F. Belo “Lires”, hatete, ekipamentu multimedia hirak ne’e sei utiliza ba apoiu kobertura media nian no prepara hela ba studio podcast Neon Metin hodi ko’alia asuntu importante sira iha rai laran no atu prepara mos ba kampaña eleisaun Parlamentár ne’ebé besik ona.

Iha fatin hanesan, Editora Neon Metin, Zevonia Vieira, relata mos servisu media nian no kobertura sira ne’ebé durante ne’e kobre barak liga ho área sosial, justisa no edukasaun.

“Asuntu konabá rai, abuzu seksual, problema sira ne’ebé estudante hasoru, sempre sai asuntu preokupasaun ne’ebé mak ema sempre debate i ko’alia. I agora tenta ona iha versaun Inglés, foti asuntu ne’ebé mak liga ho asuntu Direitus Umanus, tenta halo versaun Inglés atu nune’e ema seluk bele akompaña, outcome ida mak atu nune’e Neon Metin nia parte hosi advokasia, tenta para advokasia ne’e mos bele to’o iha nível rejional nomos internasional atu haree konabá asuntu Direitus Umanus, ba asuntu justisa ne’ebé mak da-dauk ne’e iha. Agora mos iha tempu eleisaun tenta atu halo advokasia ho asuntu feto ka ema ho difisiénsia nian.” Editora ne’e hato’o durante ko’alia ho ekipa SASCAS no RENETIL.

Editora ne’e mos hato’o, hosi publikasaun Neon Metin nian, la’os de’it hato’o informasaun maibé oinsá atu inspira mos joven sira ho publikasaun sira ne’ebé liga ho asuntu juventude nian, ne’ebé Neon Metin foti.

“Asuntu ne’ebé mak Neon Metin, jornalista sira foti ne’e, ema interese haree liu konabá justisa, sosial nomos edukasaun, liu-liu ba joven sira, atu halo sai diskusaun públiku nian, oinsá mak governu sira bele rezolve. Seluk tan mak partisipasaun joven sira nian kontribui bua dezenvolvimentu, hanesan organizasaun produtivu sira hanesan iha agrikultura, seitor turizmu sira,” nia hatutan.

Iha parte sorin, reprezentante hosi SASCAS, Tékniku Espesialidade Monitorizasaun no Avaliasaun, José da Silva, hatete, Neon Metin nia publikasaun sira iha aspetu sosial no asuntu seluk ne’e, hanesan advokasia di’ak ida, tan ne’e sira husu atu relatóriu sira hosi RENETIL nia media Neon Metin ba publikasaun sira bele sai informasaun ba Primeiru Ministru hodi haree ba asuntu hirak ne’e. “Aspetu sosial ne’e nível advokasia, entaun ita hakarak relata ba sira (Primeiru Ministru) katak ami nia parseiru sira halo servisu publikasaun, ema barak apresia,” dehan José.

Print Friendly, PDF & Email

LEAVE A REPLY

Please enter your comment!
Please enter your name here