Home Analisa Analiza ‘Dead Lock Polítika’ Ba Eleisaun Komisariu CAC

Analiza ‘Dead Lock Polítika’ Ba Eleisaun Komisariu CAC

759
0
Higino Guterres, Estudante UNTL. [Foto: Doc. Privadu | 20.02.2023]

Hakerek nain Higino Guterres, Estudante UNTL

Eleisaun ba kandidatura Komisariu CAC mandatu 2023-2026, daudaun ne’e iha impase, agónia laran, estagnadu no la realiza iha Parlamentu Nasionál. Prosesu eleisaun Komisariu CAC mandatu ida ne’e kontinua hakanek persepsaun públiku kona-ba esforsu kombate korrupsaun. Eleisaun ba kandidatura Komisariu CAC nian lolos realiza ona iha loron 13 fulan fevereiru 2023, maibé infelizmente eleisaun refere kanseladu, tanba la priense rekezitu sira, liu-liu deputadu sira la to’o na’in 49 hodi priense kuorum.

Deputadu sira iha PN halo dead lock polítiku, la hetan konsensu ida, nune’e balun la marka prezensa iha prosesu votasaun ho razaun oioin. Entre sira, balun dehan labele realiza eleisaun Komisariu CAC ne’e tanba ajenda ba eleisaun kandidatura Komisariu CAC la transparante entre sira, la iha konsensu ba nomeasaun kandidatu komisariu CAC husi deputadu sira, no seluk tan kandidatu ne’ebé proposta husi Guvernu kestionavel ho kapasidade no integridade husi deputadu sira balun.

Situasaun dead lock polítiku ne’e la’os de’it akontese iha eleisaun kandidatu komisariu CAC mandatu dahaat daudaun ne’e, maibé akontese no repete nafatin situasaun sira iha mandatu sira anterior nian. Iha tinan 2018, eleisaun ba kandidatu komisariu CAC akontese dead lock polítiku uluk ona. Deputadu sira iha Parlamentu Nasional dada malu hodi la realiza eleisaun kuaze besik fulan neen nia laran, nune’e CAC hetan vakatura tiha no funsionamentu ba atividade sira balun iha prevensaun no investigasaun kriminál ninian kuaze la la’o no paralizadu.

Haree ba fenomena polítika ne’e, hamosu interpretasaun la di’ak kona-ba vontade polítika Timor-Leste nian iha ámbitu luta kontra korrupsaun. Ba públiku, bele mosu dúvida oioin, tanba kandidatu Komisariu CAC iha prosesu eleisaun sempre sai problemátiku. Balun husu, serake ne’e iha konflitu interese entre partidu polítiku sira? Ka iha razaun tékniku ruma ne’ebé taka dalan hodi hasusar prosesu eleisaun ba kandidatu eleisaun komisariu CAC ne’e?

Konserteza, ida ne’e preokupasaun boot ke posibilidade atu hamosu ‘krize institusionál’ iha CAC hanesan esperiénsia tinan 2018-2019, no afeta ba esforsu sira luta kontra korrupsaun iha Timor-Leste. Fenomena ne’e hatudu imajen la di’ak, problemátiku no prosesu eleisaun Komisariu ne’ebé la di’ak liu hotu kompara ho ajénsia anti korrupsaun sira iha mundu.

Ba ita, kauza la realiza no dada beibeik eleisaun Komisariu CAC no dudu esforsu sira luta kontra korrupsaun iha Timor-Leste, la’os de’it fukun husi deputadu sira, maibé fukun seluk ida maka sistema legál ka instrumentu jurídiku ne’ebé mahukun sira produs iha lei estabelesimentu CAC, partikularmente iha provizaun balun kona-ba prosesu hili Komisariu CAC ne’ebé seidauk efetivu, liu-liu atu hetan ema sira ne’ebé iha kapasidade di’ak, independensia no integridade aas.

Ba ita, lei nú 8/2009-kona-ba Criação Comissão Anti-Corrupção hatudu hela lákunas oioin iha prosesu eleisaun Komisariu CAC, iha ne’ebé fo espasu atu polítiku sira kahur sira nia interese polítiku iha prosesu ne’e nia laran, liu-liu rekezitu sira ne’ebé hatuur iha artigu 7o no mós artigu 8o. Artigu rua ne’e konsidera la tulun atu buka, hili no eleje lideransa CAC ne’ebé iha kualidade di’ak, independénsia no integridade aas hodi dudu prosesu dezenvolvimentu institusionál, nune’e mós hatudu hela lákunas lubuk tanba la fó poder másimu ba CAC iha nia asaun intervensaun sira atu prevene no kombate korrupsaun iha Timor-Leste.

Artigu 7o lei nú. 8/2009 kriasaun CAC iha númeru 1 hatete nune’e, “Parlamentu Nasionál maka hili komisariu, tuir proposta husi Guvernu, liu husi deputadu sira nia votu maioria absoluta, husi sira ne’ebé marka prezensa, oituan kahaat tolu (3/4) husi deputadu sira ne’ebé hala’o sira nia funsaun, no simu pose iha Prezidente Parlamento Nasionál nia oin”.

Katak,Prosesu kandidatu komisariu CAC ne’e úniku proposta husi Guvernu, Parlamentu Nasionál mak eleje no tenke hetan maioria husi deputadu sira mínimu 49 ne’ebé priense kuorum. Ba ita, rekezitu ida ne’e, sei la garante independénsia Komisariu CAC nian, se hili husi partidu polítiku sira ne’ebé Guverna. Ba ita, ida ne’e, Partidu Politiku sira bele indika nia ema subjetivamente atu bele ba lidera instituisaun CAC tuir sira nia interese polítiku, no ne’e bele afeta ba prosesu justisa la la’o, bainhira polítiku sira ruma komete krime korrupsaun.

Nune’e mós, prosesu hili komisariu CAC husi partidu polítiku sira mesak, fásil ba polítiku sira atu volante ka halo interevensaun politikamente ba instituisaun independente ne’e. Poder politiku sira bele de’it intervein, tanba sira kesi malu ho kompromísiu politika antes hili malu ba lidera instituisaun hanesan CAC. Ne’e katak, imposivel ba Komisariu ida atu prosesa fali polítiku ida ne’ebé hili nia, se politiku ne’e komete krime korrupsaun ruma.

Alein ne’e, Parlamentu Nasionál hili Komisariu ida de’it sei afeta ba nia integridade morál bainhira foti desizaun ruma ba kazu boot karik afeta direta ba poder polítiku sira. Se instituisaun hanesan CAC ne’e mak iha Komisariu ida de’it, bele mosu abuzu poder, halo fraku pezu instituisaun no fásil monu ba tentasaun. Rísku boot ida mak, sé bainhira mosu kazu korrupsaun boot ruma hasoru lider polítiku sira, ema sogok tiha Komisariu ne’e, kazu ne’e sei labele la’o ba oin ona, apa lagi Timor ida rai ki’ik, kultura familiarizmu, klientelizmu, partidarizasaun no fatór buka servisu susar hanesan ne’e bele influénsia integridade Komisariu CAC nian.

Nune’e mós iha artigu 8o kona-ba kritéria elezibilidade sira, iha ne’ebé husu ema ne’ebé serve sai Komisariu CAC mai husi área estudu Direitu no hala’o knaar profesionál sira iha instituisaun judisiál, ne’e mós problemátiku ida. Artigu 8o, Elezibildade, iha nú. 1 hatete, “Komisariu tenke sidadadun Timoroan ida, ne’ebé goza kapasidade tomak no bele hili husi: a) Majistradu Judisiál sira; b) Majistradu Ministériu Públiku; Defensor Públiku sira; Advogadu sira; Jurista sira ho méritu rekoñesidu ho esperiénsia profesionál tinan lima ba leten; f) Ajénte polísia ne’ebé iha esperiénsia profesionál servisu nian tinan lima ba leten”. Katak, kandidatura ba Komisariu CAC, permite de’it pesoa ne’ebé hala’o ninia atividade profesionál iha instituisaun judisiál no polsiál sira ne’ebé durante ezekuta lei, ka makaer lei sira.

Loos duni katak, presiza ema ne’ebé iha koñesimentu jurídiku, maibé tenke rekoñese katak, korrupsaun konsidera nu’udar krime kompleksu no ekstra-ordináriu, iha ne’ebé Konvensaun Nasaun Unida Kontra Korrupsaun mós konvensidu katak, kombate korrupsaun presiza aprosimasaun ne’ebé komprehensivu no multidisiplináriu hodi prevene no kombate korrupsaun efetivamente. Ba ita, kombate korrupsaun la taka dalan ba espesialidade sira seluk, tanba legalista liu ne’e mós sei la tulun prosesu foti desizaun ne’ebé efetivu liu, liu-liu kabe ba misaun sira prevensaun no sensibilizasaun ninian. Esperiensia hatudu, ema ne’ebé legalista liu dalabarak la haree ba prosesu justisa ida justu no adekuadu iha kontekstu ida Timor nian, maibé buat hotu depende los de’it ba letra de lei. Ida ne’ebé perigu liu ne’e mak ba instrumentu jurídiku sira ne’ebé produs iha tendensia Copy Paste mak barak no la refleta ba situasaun no kontekstu Timor nian.

Tanba ne’e, parte ki’ik ida husi kombate korrupsaun iha Timor-Leste presiza liu atu altera lei nú 8/2009-kona-ba Criação Comissão Anti-Corrupção, liu-liu relasiona ho problema sira ne’ebé liga ho prosesu eleisaun ba Komisariu CAC nian no mós garante independénsia no integridade institusionál CAC nian, partikularmente presiza altera artigu 7o no artigu 8o. Ba ita, opsaun ideál no efetivu liu maka prosesu hili Komisariu CAC nian tenke mai husi prosesu selesaun ida rigór. Estadu presiza estabelese Komisaun Ad Hoc ida ne’ebé mai husi pesoa sira ho kapasidade no independénsia di’ak hodi rekruta ka selesiona kandidatu Komisariu CAC nian ne’ebé ho kualidade di’ak, en termus komprende kle’an asuntu legál nian. Seluk husi ne’e presiza mós entende kle’an área sira sosiolójiku, filozófiku, ekonomia, kultura, psikolojia no seluk tan, nune’e mós iha integridade aas no nia background ne’ebé moos.

Parte seluk, instituisaun hanesan CAC labele iha Komisariu ida mesak mak lidera. Estadu presiza hili Komisariu CAC tenke na’in lima (5) hanesan ne’e no multidisiplináriu, nune’e evita konflitu interese no abuzu poder. Komisariu CAC na’in lima sei iha poder ka pezu boot liu tan hodi tetu no deside kazu boboot sira ne’ebé tama iha krime korrupsaun sira ho kompleksidade oioin. Esperiensia ida ne’e hatudu ona iha nasaun sira seluk hanesan KPK Indonesia. KPK Indonesia nia prosesu eleisaun hodi hetan Komisariu sira la’o di’ak no kualidade tebtebes, tanba iha Komisaun ida ne’ebé estabelese hodi hala’o selesaun ba Komisariu sira, nune’e mós sira nia lei fó dalan atu Komisariu KPK nian to’o na’in lima no iha poder no kompeténsia hanesan.

Espera, poder politiku sira bele opta esperiensia sira hanesan ne’e nu’udar opsaun ideál hodi hatuur instrumentu jurídiku ida justu no efetivu hodi solusiona problema sira iha prosesu hili Komisariu CAC Timor-Leste nian no meius di’ak liu ba prevene no kombate korrupsaun iha Timor-Leste. Sem ne’e nihil.

Nota Finál:

*(Artigu ida ne’e, ita elabora hafoin marsa dialetika no rezultadu diskusaun no análiza ne’ebé hala’o ho belun asesór juridiku Timoroan sira ne’ebé progresivu iha intervalu de tempu. A luta kontinua)

Print Friendly, PDF & Email

LEAVE A REPLY

Please enter your comment!
Please enter your name here