Reportajen Agustinha Amaral
Diretor Ezekutivu Centro Nasional Chega (CNC!), Hugo Maria Fernandes, hatete Festival Fronteira 2023 projeta promosaun ba dame, fraternidade umana, valoriza diversidade no pluralidade kultura entre Timor-Leste no Indonesia.
Diretor Ezekutivu Chega hatete katak, Festival Fronteira 2023 nu’udar instrumentu pas ho objetivu atu hametin lasu amizade entre Timor-oan sira ne’ebe fahe malu ba konflitu pasadu husi tinan 1974 no hakotu iha tinan 1999 no hametin lasu amizade entre estadu rua.
Nia akresenta, Festival Fronteira 2023 projeta promosaun ba dame, fraternidade umana, valoriza diversidade no pluralidade kultura entre Timor-Leste no Indonesia, promove konetidade no empodera komunidade ka sosiedade sira liu husi aspeitu kultural no istória ne’ebé refleta no inspira interasaun sosial.
“Eventu ne’e sai nu’udar plataforma ba múzika sira, grupu ka komunidade teatru, eskritor, fotografer, jornalista, peskizador no estudante sira iha Timor-Leste no Indonesia nomos sai prosesu intrerkambiu hodi hamosu koperasaun mutual no valorizasaun istória no diversidade kultura.” Dehan Diretor Chega iha entrevista, iha Festival Fronteira iha Munisípou Bobonaru, Kuarta 15/11.
Nia dehan tan, atu promove no haforti relasaun tradisaun kultura hodi kontaktu no hakarak di’ak husi ema Timor-oan husi Timor-Leste no Timor-oan sira ne’ebé sei iha Indonesia, liu-liu sira ne’ebé iha Timor Osidental, hodi haree liu ba sósiu kultura.
“Relasaun tradisaun kultura ho ema Timor-oan sira ne’ebé moris iha tasi-balu ka ne’ebé foti ona sidadania rai seluk nian hodi nune’e ema hirak ne’e, ne’ebé fiar sira nia aan atu kaer metin nafatin sira nia ligasaun familia, kultura, iha ona koñesimentu mutual entre jerasaun foun sira husi nasaun rua, hodi hamosu produsaun konjunta ba konteúdu sira konabá kultura no istória liu husi obra arte literatura.”
Entre tantu Centro Chega liu husi servisu konjunta ho Sekretáriu Estadu Arte no kultura (SEAK) hodi organiza Festival Fronteira 2023 ho tema “Interkámbiu Kultural ba Hametin Rekonsiliasaun.”
