Home Justisa Asaun 12 Novembru Lori Joven Hosi Inan-Aman Partido Oioin Hamutuk

Asaun 12 Novembru Lori Joven Hosi Inan-Aman Partido Oioin Hamutuk

391
0
Familia vitima masakre 12 Novembru 1991, komemora loron masacre no kontinua ezije ba estadu Indonesia hodi hatudu familia ne'ebe lakon iha loron 12 Nov 1991. [Foto: Francisco JDA | 12.11.2019]

Reportazen Francisco JDA

Tama ona tinan 28 povu maubere komemora Masakre Santa Cuz, 12 Novembru 1991, ho tema “Juventude Maka Futuru no Autor ba Dezenvolvimentu Nasional”. Loron imporante ida ne’e estadu marka ona hanesan mos loron Nasional Juventude.

Iha abertura ba loron Masakre 12 Novembru 1991, Prezidente Komite 12 Novembru, Gregorio Saldanha hatoo deskursu katak, selebrasaun Loron Nasional Juventude badala 14 no Komemorasaun ba Masacre Santa Cruz ba tinan 28, nudar patrimonio ba Timor oan hotu no loron Nasional Juventude, hatur tuir Lei nu.10/2005 aprova iha Parlamentu Nasional.

“Ohin ita halo tinan 28 Masacre Santa Cruz nian nu’udar rekorda juventude Loriku Aswain sira ne’ebé inan aman sira mai husi partidu politiku oin-oin, hamriik hamutuk nudar simbolu nasional, ho aten brani liman mamuk, hakilar lia fuan lulik mate ka moris ukun rasik an, hasoru militar indonesia ho kilat kroat,” tenik Presidente Komite 12 Novembro.

Gregorio realsa liutan katak, husi lia fuan mate ka moris ukun rasik an, povo mak sai hanesan mata dalan ba terus no mate iha fatin oin-oin, hanesan mos masakre iha fatin barak, iha tempo naruk nia laran, maske nune’e maibe uniaun joven sira nunka para hodi hasoru inimigu sira.

“Kilat musan bele oho sira nia isin, juventude Loriku Aswain firme desididu iha luta klandestina no luta aberta, hahu husi manifestasaun pasifika iha Tasi-Tolu, dedikasaun sira iha lian kroat iha 12 de Novembro revela povo nia terus naruk no habadak dalan ba ukun rasik an. Loriku Aswain sira nia hakilar too ran nakfakar, too mate iha fatin lulik ida ne’e, fanu komunidade internasional husi toba dukur ba problema Timor-Leste durante tempu naruk,” hateten Gregorio.

Iha fatin hanesan sobrevintes 12 de Novembro, Alexandrinho da Costa, ho naran kodiku Alex Samurai, enkoraza foinsa’e sira atu bele kria estabilidade no paz no respeita joven uluk sira nia sakrifisiu ba luta ukun rasik an

“Ita sira ne’e la iha diferensia, ita tenke valoriza nafatin, respeita nafatin sira nia sakrifisio ne’ebé mak mate iha fatin ida ne’e. Rai Santa Cruz ne’e lulik, joven sira iha momentu ne’eba ne’e inosente tebes, la iha kilat ka kroat atu hasoru inimigo, maibe sira fo tomak sira nia dedikasaun, laran mos ho objetivu atu liberta rai ida ne’e,” tenik Alex Samurai.

Alex hatutan dehan, nudar mate restu, nafatin fo apoio tomak ba estadu, no governo, hodi harii Timor-Leste sai furak litan, loron ida ne’e imprtante ba povo tomak, feto no mane tanba iha tempo ne’eba laos mane deit mak luta maibe joven barak ho idade menoridade, ferik, katuas no eskola oan sira hatene ona oinsa mak bele ukun an.

LEAVE A REPLY

Please enter your comment!
Please enter your name here