Home Notisia Covid-19, Airnorth Semana 1 Ona La Semo Mai TL, Oinsa Ho Konfirmasaun...

Covid-19, Airnorth Semana 1 Ona La Semo Mai TL, Oinsa Ho Konfirmasaun Swab Test Iha Darwin?

310
0
Aviaun Airnorth semo hosi Darwin-Dili-Darin. [Foto: Copyright google | 05.05.2020]

Reportazen Zevonia Vieira

Situasaun moras surtu virus Corona ne’ebe afeta mai Timor-Leste tanba liu hosi kazu importa. Ba teste ne’ebe mak Timor-Leste uza mak Polimerase Chain reaction (PCR) ho specimen type Nasopharyngeal Throat Swab, hodi detekta virus corona hosi kaben kakorok. Teste ne’ebe mak halo iha Laboratoriu Nasional no mos halo konfirmasaun iha Royal Hospital Darwin atu hare nia validasaun.

Rezultadu teste sira ne’ebe halo ona konfirmasaun iha Darwin sempre lori fila mai Dili ho aviaun Airnorth, maibe informasaun ne’ebe Neon Metin rekolha katak semana ida ona, hahu hosi 26 Abril aviaun Airnorth la semo mai Timor, hodi lori rezultadu teste mai Timor.

Iha parte seluk liu Centru Integradu Jestaun Krize [CIJK], portavoz CIJK kada loron oras 3:00 lorokraik sempre relata dadus ba moras Covid-19.

Hosi dadus ne’ebe Neon Metin rekolha katak kazu konfirmadu positivu Covid-19 ikus nian ne’ebe mak CIJK relata mak iha loron 24 Abril, katak detekta kazu foun ida no total kazu konfirmadu ikus to’o ohin loron mantein ho ema nain 24 no hahu hosi loron tuir mai 25 Abril laiha kazu konfirmadu foun to’o ohin loron 5 Maiu.

Konaba total kumulativu hein rezultadu labortoriu iha loron 5 Maiu tun ba ema nain 73, kompara ho horseik loron 4 Maiu total ema nain 103, hosi hein rezultadu teste kada loron mos tun ka menus.

Relasiona ho aviaun Airnorth hosi Darwin ne’ebe mak semana ida ona la semo mai Timor, oinsa ho sample ka amostra sira ne’ebe mak sei iha hela Darwin? Ba Neon Metin Dr. Rui Araujo hateten aviaun Airnorth la mai Timor hahu iha sesta feira liu ba, antes sesta feira sample hotu iha  momentu ne’e haruka ona ba halo konfirmasaun, “keta haluha katak Darwin ne’e atu halo konfirmasaun deit, analize ne’ebe Laboratoriu Nasional Saude (LNS) halo kontinua lao nafatin”.

Dr. Rui hatutan sei hein iha semana ne’e nia laran aviaun hahu semo fila fali, hodi lori sample ka amostra balun ne’ebe sedauk konsege haruka mai to’o ohin loron, ita bele haruka hodi hein nia konfirmasaun.

“Dala idatan exame Laboratoiru Nasional kontinua lao nafatin hodi halo teste, tanba ne’e mak repara karik hosi horseik mai ohin numeru rezultadu hosi hein ne’e menus ka tun. Signifika rezultadu teste negative ba semana ida nia laran ne’e sae hela deit ne’e halo teste iha Laboratoriu Nasional ho mos hirak ne’ebe lori ba Darwin antes de sesta feira”, esplika Dr. Rui Araujo

Bainhira nutisia ne’e sae Neon Metin sedauk halo konfirmasaun ho Ministériu Transporte no Komunikasaun relasiona ho aviaun Airnort ne’ebe la semo mai Timor liu ona semana ida.

LEAVE A REPLY

Please enter your comment!
Please enter your name here