Reportajen Juvinal Cabral dos Santos
Portavoz Ernestina Da Costa hateten, Asosiasaun Difisiénsia Timor-Leste (ADTL) no Ra’es Hadomi Timor-Oan (RHTO), lamenta tebes ho desizaun governu ne’ebé hapara programa bolsa da mae jerasaun foun, liu hosi notisia ne’ebé Públika husi ajensia Tatoli.
“Ami lamentavel tebes desizaun MSSI hapara programa bolsa da mae jerasaun foun, tanba benifisariu hamutuk 57.000 husi Munisipiu 7 hanesan Ainaro, Bobonaru, Covalima, Liquisa, Manatuto, Oekusse no Viqueque sei lakon sira nia direitu hetan subsidiu ne’ebé estabelese tuir dekretu Lei no 22/2021. No benifisariu hamutuk 134.000 sei lakon oportunidade atu asesu subsidiu husi munisipiu Aileu, Baukau, Ermera, Lautem no Manufahi, .” dehan portavoz Ernestina da Costa, iha komferensia Imprensa, ihs Edifisiu RHTO, sexta, 17/11.
Nia haktuir, organizasaun ema ho defisensia nia haree desizaun Ministériu Solidariedade Sosiál no Inkluzaun-(MSSI) la refleta ba programa governu da-9 nian, la refleta komprimisiu Prezidente da Republika nian inklui la kontribui ba atinjimentu meta planu estratejiku dezenvolvimentu nasional no objetivu dezenvolvimentu sustentavel.
Governu nia programa sita katak feto, labarik no defisiensia mak save ba susesu no dezenvolvimentu sustentavel, komprimisiu Ida ne’e funda ho baze legal Konstituisaun Republika Demokratika Timor-Leste (K-RDTL) hanesan iha Art. 16- Igualdade no Universalidade, Art. 18- Protesaun Labarik, Art. 21-Protesaun Ema ho Defisiensia, no komprimisiu ba konvensaun internasional sira haktuir artigo 9 K-RDTL.
” Ami konsidera, desizaun Ida ne’e sei rezulta numeru sidadaun vulneravel aumenta liutan hanesan labarik, inan isin rua no grupo vulnerablidade seluk, numeru soe bebe, malnutrisaun no defisiensia sei aumenta tanba kondisaun ekonomia” Nia hateten.
Nia esplika, Timor-Leste iha ambisaun bo’ot ba redusaun pobreza hadi’a saude, melhora nutrisaun, no buka esforsu ba Bem-star sidadaun nian. Programa bolsa da mae jerasaun foun ne’ebé estabelese liu husi dekretu Lei no 22/2021 (10 Novembro 2021) mak programa ne’ebé bele kontribui ba objetivu hamenus kiak, hadiak nutrisaun no haburas ekonomia familia nian
Nia akresenta, Relasiona deskontinusaun programa ne’e sei rezulta joven hamutuk nain 250 lakon servisu iha munisipiu 7 ne’ebé implementa hela programa ne’e potensia atu kria tan servisu ba joven 250 sei la akontese, desizaun ida ne’e hatudu governu la seriu investe ba labarik nu’udar futuru nasaun Timor-Leste nian. Governu la kontribui ba pilar sedu ba ema ho defisiensia tanba lakon oportunidade atu investe no hadiak kondisaun labarik husi nia siklu moris inisiu
“Ami hakarak rekomenda atu Konsellu Ministro kontinua aloka orsamentu estadu ba programa bolsa da mae jerasaun foun, no sua Eselensia Ministra MSSI esplika razaun termina programa bolsa da mae ba jerasaun foun bele deklara mos ba públiku sa alternativu mak bele hatan fali inan isin rua, labarik no ema ho defisiensia ne’ebé benefisia ona husi bolsa da mae ba jerasaun foun” dehan Ernestina .
Entretantu, Konferensia imprensa ne’e, organiza husi ADTL no RHTO prezensa husi AHDMTL, ETBU, KDTL, CBRNTL, AHISAUN, CDITL, AEFDTL, no Asesor Prinsipal Prezidente da Republika.
