Home Meio Ambiente Oxfam ho AJTL Organiza Media Tour Ba Jornalista, Foka Ba Asuntu Justisa...

Oxfam ho AJTL Organiza Media Tour Ba Jornalista, Foka Ba Asuntu Justisa Klimátika

343
0
Oxfam - AJTL halo konferensia imprensa. [Foto: Racom Maubisse | 20.02.2023]

Reportajen Silvino Freitas

Oxfam iha Timor-Leste kolabora hamutuk ho Asosiasaun Jornalista Timor Lorosa’e (AJTL), realiza Media Tour 2023 ba da toluk nian, ne’ebe foka liu ba justisa klimátika no mudansa klimátika.

Liuhusi konferénsia imprensa Jerente ba Asuntu Influénsia husi Oxfam iha Timor Leste, Adilsonio da Costa Junior hateten, MédiaTour ne’e fasilita jornalista sira, atu halo kobertura konaba efeitu husi mudansa klimátika ba komunidade sira liuliu feto, labarik feto no Ema ho Defisiénsia inklui ema vulnerable sira ne’ebé sai vitima ba krize klimátika, ne’ebe mundu inklui Timor-Leste enfrenta.

“Média-tour ne’e ho naran ativismu ambientál ho objetivu atu aumenta konnesimentu jornalista sira nia, membru organizasaun sosiedade sivil no joven sira atu bele esplora no buka hatene informasaun sira iha baze, liuliu area sira ne’ebé sai alvu no ekipa jornalista sira hodi identifika kazu sira ne’ebe komunidade sira hasoru, relasiona ho mudansa klimátika no justisa klimátika”, dehan Adilsonio liuhusi konferénsia imprensa iha Oxfam Hudi-Laran,(20/02).

Nia dehan iha kobertura média-tour ida ne’e, jornalista sira sei hala’o kobertura durante loron 4 iha munisípiu Ermera no RAEOA,  hodi lori informasaun sira husi komunidade, no esplora liu tan matenek lokál sira ne’ebé durante ne’e uza hodi halo reziliente hasoru mudansa klimátika.

“Sira mós halo kobertura ba programa balun ne’ebé kona-ba konservasaun bee ne’ebé involve mós joven feto no mane, ema ho defisiente no mós organizasaun komunidade sira” nia dehan.

Antes ne’e Oxfam ho AJTL organiza ona workshop hamutuk ho Sekretariu Estadu Ambiente liuhusi direasaun Autoridade Nasional Desiganda (AND), PERMATIL no Oxfam hodi hetan informasaun importante sira konaba justisa klimátika no impaktu mudansa klimátika ba povu liu-liu ba grupu vulneravel sira.

Fatin hanesan Prezidente AJTL, Zevonia Vieira hateten, liuhusi Media Tour ne’e, jornalista sira sei halo estudu kazu ba justisa klimátika ne’ebé fo impaktu ba ema vulnerable sira mak hanesan feto no labarik sira, no mos Ema ho Defisiensia, no fo espasu ba lian-la’ek sira hato’o situasaun no preokupasaun mak sira enfrenta iha baze liu-liu konaba impaktu husi krize klimátika ne’e rasik.

“Ida ne’e hanesan atividade importante ba jornalista sira, ne’ebe organiza husi Oxfam ho AJTL, nune’e jornalista sira bele identifika rasik problema sira mudansa klimátika, no mos la ses husi pilar tolu Oxfam nian konaba Justisa Klimatika, Justisa Ekonomia no Justisa Jeneru. Ba AJTL ida ne’e importante tebes oinsa halo advokasia, nune’e bele aprosima governu no Parlamentu Nasional hodi bele buka solusaun ne’ebe bele fo benefísiu ba komunidade”, dehan Zevonia

Entretantu jornalista sira ne’ebé partisipa iha Media Tour hamutuk nain 15, kompostu husi RTTL, G-News, Jornal Independent, Naunil, Neon Metin, Radio Liberdade, Lafaek News, Loluwari, Timor post, Dili Post, Radio Komunidade Maubise, no kolabora ho grupu joven produtivu TILOFE, EAMO no Joven Ba Mudansa.

Print Friendly, PDF & Email

LEAVE A REPLY

Please enter your comment!
Please enter your name here