Home Notisia Traballadór Timor-oan na’in 50 Sei Arranka Ba Servisu Iha Korea Du Súl...

Traballadór Timor-oan na’in 50 Sei Arranka Ba Servisu Iha Korea Du Súl Iha Área Fábrika

1105
0
Traballadór Timor-oan na'in 50 Sei Arranka Ba Servisu Iha Korea Du Súl. [Foto: Umbelina | 18.03.2023]

Reportajen Umbelina dos Reis

Sekretáriu Estadu Formasaun Profisionál no Empregu (SEFOPE), liu husi Diresaun Nasionál Empregu Exterior (DNEE), realiza serimónia despedida entre traballadór no familia no mos asina deklarasaun ho joven Timor-oan na’in 50, ne’ebé atu arranka ba servisu iha Korea du Sul iha área fábrika, iha Domingu 19 Marsu.

Diretor Nasional Empregu Exterior, Filomeno Soares, hateten objetivu hosi serimónia refere ko’alia konaba família hosi traballador ho governu Timor-Leste liu hosi SEFOPE halo akordu asina deklarasaun ba traballadór sira ne’ebé prepara aan atu ba servisu iha Korea du Sul, nune’e loron ikus traballadór Timor-oan ba servisu iha Korea Sul hetan falla  ruma karik lalika dun ba malu, maibé  governu Timor-Leste ho governi Korea du Sul bele tur hamutuk hodi rezolve.

“Atividade esensial ne’e hatudu ba públiku katak família prontu husik ona oan, la’en, subriñu ba servisu iha korea du Sul, la’os governu mak obriga maibé governu só kria kondisoens nune’e Timor-oan  tenki apriveita oportunidade maibé atu hetan oportunidade tenki iha akordu ida, hitam di atas putih”, dehan Diretór DNEE, Filomeno Soares iha Salaun Timor Lodge, Sexta-feira, 17/03.

Alende ne’e nia informa mós ba família sira katak, polítika governu nian klaru buka dalan oinsá ba Timor-oan ne’ebé iha abilidade atu kompete ba iha merkadu nasionál no internasionál. VIII Governu konstituisionál konsege ona halo koperasaun hosi nasaun barak, primeiru Korea, segundu Austrália, terseiru Japaun no Dubai. Joven sira tenki servisu hamutuk ho sentru formasaun sira oinsá bele hakbiit joven ne’ebé iha abilidade no skill hodi bele kompete ba iha merkadu internasionál, nune’e oinsá Timor-oan bele hadi’a nesesidade ekonomia família no kreximentu ekonomia rai laran, nia dehan.

Planu Governu Timor-leste, kada tinan governu Timor-Leste liu hosi SEFOPE haruka traballadór Timor-oan na’in 500 ba servisu iha Korea. Iha tinan 2022 ba kotuk governu servisu maka’as ho parseria sira Timor labele lakon oportunidade ho nasaun 16. Tinan 2022 SEFOPE haruka traballadór Timor oan hamutuk 1600 ba servisu iha Korea.

Nia dehan, Governu fó kontratu ba traballadór Timor-oan minímu tinan 3 maximu tinan 4 fulan 8, kontratu ne’e hotu fila mai Timor hodi dezemvolve rai doben Timor-Leste. Tanba atu dezemvolve nasaun ba oin ne’e joven sira ne’ebé servisu iha Korea no Austrália.

SEFOPE haruka traballadór Timor-oan ba servisu iha Korea hamutuk na’in 50, grupu ne’e ba área fábrika nian, traballadór Timor-oan sei aranka iha loron domingu, 10 Marsu ho kontratu traballador minímu tinan 3, maximu tinan 4 fulan 8. Governo Korea implementa  salário ba traballadór entre nasaun 16 inklui Timor-Leste ho saláriu kada fulan US $2000.

Traballadór Timor-oan ne’ebé servisu iha Korea halai ses hosi sistema dadus hamutuk 700 mak sai hanesan raballadór ilegál iha Korea. Maibé da-dauk ne’e governu Korea no governu Timor-Leste  buka estratéjia oinsá hodi reduz númeru ba trabaladór ilegál sira.

Iha fatin hanesan reprezentante inan-aman Josefina Castro hateten, agradese ba governu Timor-Leste no governu Korea, tanba suporta maka’as Timor-oan sira hodi bele servisu iha Korea du Sul.

“Ha’u kontente no agradese tebes tanba governu fasilita Timor-oan ba servisu iha rai li’ur inklui ha’u nia  kaben bele hetan oportunidade di’ak hodi ba servisu, nune’e fila mai Timor bele sustenta familia no dezemvolve rai doben Timor,” nia dehan.

Print Friendly, PDF & Email

LEAVE A REPLY

Please enter your comment!
Please enter your name here