Reportajen Silvino Freitas
Komunidade suku Fahiria postu Aileu Villa Munisípiu Aileu, balun halerik nafatin ba bee moos tanba aldeia 3 iha foho leten nune’e labele asesu bee ho di’ak no problema ne’e mós fó impaktu ba komunidade infrenta hamlaha iha tinan ne’e.
Alberto Loteus xefe Suku Fahiria hateten, bee sai fator determinante ba buat hotu seitor hotu laiha bee ema la halo buat ida maka agrikultura, edukasaun no saúde, ita bele la’o bele iha planu oioin maibé kuandu laiha bee sei la halo buat ruma.
“Hau nia populasaun 95% moris iha agricultura iha aldeia 6, 3 iha vila no 3 iha foho leten, maibé 3 iha foho leten sira iha leten bee iha kraik, hau husu ba naiulun sira halo took analiza” dehan Alberto iha salaun City8 Dili, (22/03).
Nia dehan, komunidade ida suku Fahiria asesu ba bee moos ho 50% tanba iha aldeia 3 vila mak asesu ho di’ak no 3 iha foho la asesu, nunee kanalizasaun bee ne’e husi mota tanba nee la garantia nia kualidade nune’e bainhira udan bee foer, tanba ne’e iha aldeia 2 mak iha problema mak aldeia, problema halo inan sira ne’ebé atu kuru bee tenke la’o ho distánsia do’ok.
“Iha aldeia ida to’o agora mais ita iha alternativu balun ne’ebé bele fo resposta ba sira nia preokupasaun, tanba ita sukat ona husi sira nia distánsia bee, presiza de’it kustu uituan entaun ita iha ona dalan para ita fornese bee ne’ebé adekuadu maske bee ne’e la moos liu maibé bele ona uza ba nesesidade sira nian” nia dehan.
Nia mós dehan tan tanba ho problema bee ne’e fó posibilidade komunidade suku Fahiria sei infrenta hamlaha, tanba komunidade sira kuda hare no modo depende de’it ba udan-been.
Entretantu suku Fahiria populasaun hamutuk 2,574.