Reportajen Silvino Freitas
Suku Fahiria Postu Aileu Villa munisípiu Aileu, implementa ona uma naroman ba povu, tolu remata ona iha faze pilotu, no 9 iha faze normál nia progressu atinje ona 75%, nune’e benefisiáriu mak ema vulnerable no ema ho defisiente.
Xefe Suku Fahiria Alberto Loteus hateten, Uma naroman ba povu iha nia suku rasik iha faze pilotu remata ona uma 3 no ema hela ona inklui mós entrega ona sertifikadu ba benefisiáriu sira.
“Iha faze normál ne’e ita iha uma 9 no nia progressu iha ona 75%, hein laran ho plafon no pinta remata ona bele lori ba iha ingurasaun” dehan Xefe Suku Alberto iha City8 Manleuana Dili, (22/03).
Nia dehan, uma 9 ne’e kompostu husi aldeia 3 tanba iha pilotu ne’e ba ona aldeia 3 entaun faze normál ne’e ba iha aldeia 3 fali tama ona ba avaliasaun dokumentu nian, iha aldeia sidole 4, manulete 4 no ida sei fahe ba aldeia ne’ebé hetan uluk ona, nune’e ema sira ne’ebé benefísia ne’e maka ema kbiit laek, tanba bazeia ba uma primeiru ne’e.
“Uma primeiru ne’e ba ema vulnerable de’it maibé uma 9 atu inagura ne’e involve ema difisénsia iha ne’ebá, tanba lei mós dehan atu valoriza ema ho difisénsia, depois nia konstrusaun ne’e mos reflete kedan ba ema ho difisénsia sira, oinsá mak sira bele uza kadeira roda” nia dehan.
Entretantu iha suku Fahiria identifika ema ho difisiente 2 atu benefísia ba uma naroman ba povu, ida hetan ona benefísiu ida sei tama iha faze normál ne’e rasik, entretantu ema ho difisiente seluk iha suku Fahiria hetan ona apoiu husi programa seguransa sosiál nian.
