Home Memoria Merita Alves Husik Nia Ain-Leut Ba Jerasaun Ohinloron No Abanbainrua Atu Hakat...

Merita Alves Husik Nia Ain-Leut Ba Jerasaun Ohinloron No Abanbainrua Atu Hakat Tuir

398
0
Saudosa Merita Alves, Sekretariu Jeral OPMT, 2016 - 2021 (Foto: NRT)

By Nuno Rodrigues Tchailoro

Iha 24 maiu 2021, iha ninia rezidénsia, iha Kuluhun, Lourdes Maria Alves Araújo nia iis kotu tan moras. Nu’udar eroina ida, ninia isin mak mate maibé ninia hanoin no espirítu nunka mate, nia husik hela nia ain-leut ne’ebé sei hela rohan-laek hodi  hatudu  dalan ba jerasaun ohinloron no abanbainrua atu hakat tuir.

Otas sei nurak tebes, ho idade 19, maske mai husi família élite ida, buibere Lourdes Maria Alves Araújo komprometidu nia an halo suicidio ideolójiku hamutuk ho nia kompañeru da luta sira, husik buat hotu-hotu  moris hamutuk ho maioria Povu ne’ebé ain-tanan hodi luta ba libertasaun totál e kompleta.

Nia ema ida determinadu no dedika an tomak la’ós de’it ba luta ukun rasik-an ninian maibé mós nu’udar figura ida ne’ebé hamriik iha oin hodi defende no promove emansipasaun feto to’o nia iis kotu. Iha ninia hahalok reprezenta valores no prinsípiu ne’ebé nia aprende durante tinan-tolu iha zonas libertadas.

Merita Alves, naran ne’ebé koñesidu liu, moris iha Hatolia, Ermera, 15 Agostu 1956 husi aman Herminio Marques Alves no inan Guilhermina de Jesus Alves. Nia oan dahuluk husi maun-alin na’in-sia, feto haat, mane lima. 

Nia iha fé polítika ida katak ukun rasik-an loloos so bele hetan bainhira feto kore-an no emansipa ona husi sistema patrialkal ne’ebé hanehan.

Sibete ka Bikiak, nu’udar nia naran-funu ne’ebé nia hili, hahú hetan konxiénsia polítika nu’udar Povu Maubere ne’ebé luta ba libertasaun nasionál no ba emansipasaun feto iha zonas libertadas iha Sector Centro Norte. Ba Merita ho edukasaun Eskola Téknika  kuartu ano kursu jerál Komérsiu, formasaun polítika tinan tolu iha ai-laran mesmu la’ós universidade formál ida maibé loke dalan atu hatene polítika no hanorin polítika ba Povu Maubere tuir valór no prinsípiu Fretilin ninian.  Ida ne’e loos duni, ninia pensamentu no termus sosiál polítiku ne’ebé nia uza hatudu nia koñesimentu ida klean tebes.

Ninia definisaun polítika diferente tebes ho saida mak públiku ohinloron hatene.  Nu’udar Vise-Sekretária OPMT iha Zona Modok (parte Laclo) hamutuk ho kuadru polítiku sira seluk, nia aprende husi povu no hanorin povu, halo povu hatene lee no hakerek, taumatan ba labarik iha krexe, kooperativa produsaun no distribuisaun, saúde popular, seguransa no arte. Nia hateten katak knaar kuadru Fretilin nian mak atu transforma Povu Maubere nia moris hodi la sai atan ba ema ida no kaer rasik nia kuda talin. Signifika moris hamutuk ho Povu no serbisu hamutuk ho Povu ba ninian transformasaun rasik. Povu la’ós objetu maibé sai sujeitu ba ninia libertasaun.  Merita hateten, iha kada teoria, iha ninia prátika. Kuadru Fretilin tenke sai ezemplar tuir Nicolau Lobato ninia hanorin.  Ida ne’e nia sempre hateten beibeik ba jerasaun foun sira atu banati tuir lider revolusionáriu sira hanesan Nicolau Lobato, Sahe, Mau-Lear, Wewe no Bi-Lear no sira seluk ne’ebé nia fahe esperiénsia hamutuk.

Iha tinan-1977, hafoin Konferénsia CCF iha Laline, Merita Alves asume kargu Assistente Komisariadu. Nia knaar mak supreviziona atividade komisariada nian hodi aprezenta relatóriu ba diresaun Komisariadu, Adjuntu no Komisariadu Polítiku.

Iha Komisariadu, Merita Alves sai lokutora Radio Maubere hamutuk ho Martina Sousa, Nicolau Lobato nia kaben, to’o militár Indonézia kaptura.

Iha operasaun Serku no Anikilamentu husi militár Indonézia, Merita Alves apaña estallasu bomba,  halo nia monu tun kedas ba rai. Sorte ho tulun kolaboradór Estadu Maior salva nia hodi dada tun ba mota-laran, halai dook husi ataka surpreza forsa okupante nian.

Iha  1 Janeiru 1979, iha Koramil Becora, Buibere Merita Alves, hamutuk ho família, hetan detensaun preventiva.

Hafoin inimigu kaer, Merita Alves mai kastigu kedas iha San Tai Ho hamutuk ho nia kompañeru da luta sira seluk. Militár Indonézia deskonfia Merita Alves hatene Nicolau Lobato nia paradeiru tanba serbisu besik ho Nicolau Lobato nia feen tan ne’e  obriga nia atu pinta Nicolau Lobato nia oin,  hateten-sai lider FRETILIN sira-nia paradeiru,  kilat hira mak sei iha ai-laran, no se se mak sei iha ai-laran. Loron-loron militar halo inkeritu ba nia. Maibé ho firmeza, Merita Alves nunka hateten sai buat ida. Bainhira militár obriga nia hatán de’it katak nia la hatene.

Merita Alves la taka nia pozisaun polítika no dalabarak konfronta ho militár Indonézia. Bainhira militár Indonézia hateten katak funu hotu ona no Fretilin lakon ona,  Merita Alves la simu hodi hatan katak laiha buat ida tempu mak sei ko’alia.  Nia pozisaun ne’ebé firme, lakohi hatán inkeritu sira, militár Indonézia iha planu atu lori ba oho, maibé nia hetan sorte tan nia prima Abati Alves, Francisco Lopes da Cruz nia kaben mai salva  nia hodi lori sai husi kadeia. Nia kompañeru da luta sira seluk iha kadeia militár Indonézia oho hotu.

Iha San Tai Ho mak Merita Alves koñese malu ho fundadór ASDT no membru Comité Central FRETILIN Octavio Jordão Araújo. Torturasaun beibeik husi militár Indonézia no atu proteje-an husi violasaun, Merita Alves no Octavio ne’ebé sei sai prezu hodi halo aprezentasaun periódika ba militár Indonézia ho organiza kazamentu subsubar hasasin husi ema na’in-ualo iha igreja ho apoiu tomak husi Bispu Dom Martinho Lopes.

Iha San Tai Ho, Merita Alves hasoru malu no hetan enkorajamentu husi pioneira ida ba luta klandestina nian Maria Gorrete atu kontinua firme ho konviksaun polítiku no labele hakiduk ho presaun psikolójiku no torturasaun fízika inimigu ninian.

Iha 1980, militár Indonézia kaer fila-fali Merita Alves ho nia kaben tan inimigu deskonfia sira-nia envolvimentu iha asaltu Marabia, 10 Juñu 1980. Nia kaben, desde invazaun Indonézia, inimigu kaptura fila-fila, nia gasta nia tempu barakliu iha prizaun no bainhira fila ba uma nia moris la hakmatek tan inimigu sempre kontrola.

Iha 1988, bainhira Octavio Jordão Araújo sai fali ona husi prizaun, sira-rua kontinua fali atividade klandestina iha grupu ki’ik ho rezisténsia iha ai-laran iha grupu ki’ik.

Merita Alves hamutuk ho nia kaben iha tinan 1990 ho karreta lori material konstrusaun ne’ebé hetan husi Helena Maria de Araújo ‘Kaiku’ hodi harii ‘abrigu’ iha Aliança Araújo nia uma iha Lahane ba Xanana Gusmão atu halo atividade guerrilla urbana. Merita Alves,  Octavio Jordão de Araújo no Helena Maria de Araújo mak responsabiliza ba apoiu lojistika loron-loron nia durante Xanana Gusmão hela iha ‘abrigu’. Maske hatene Xanana Gusmão iha hela ‘abrigu’ ne’e no Aliança husu atu bele hasoru,  Merita deside atu la hasoru diretamente tanba se akontese buat ruma ba lider másimu rezisténsia nia, ema bele deskonfia nia halo traisaun.

Merita hamutuk ho nia feto maluk sira hatudu katak organizasaun klandestina la’o forte tebes tanba ne’e bele fó protesaun ba kuadru FALINTIL no klandestina sira atu hala’o nia atividade polítika iha sidade laran. Husi uma mak organizasaun klandestina hahú no habelar. Husi uma mak enkontru klandestina sira hala’o, organiza manifestasaun, hatutan informasaun ba malu,  harii kaixa, fó protesaun no tratamentu saúde ba luta na’in sira.

Kapturasaun Xanana Gusmão iha 1992 iha Lahane, Merita Alves ho nia kaben  sai dadur dala ida tan iha Colmera, Nanggala nia fatin.

Merita Alves uza rede família envolve iha klandestina, maske ki’ik maibé forte tebes no seguru liu atu organiza malu. Hahú kedas husi nia kaben,  nia alin na’in-rua São Alves no Melkias Alves no nia kuñada Helena Araújo, kontribuisaun ida ne’ebé boot tebes.

Iha perseguisaun inimigu ninian nian, Merita Alves sempre iha dalan atu fó apoiu fó apoiu ba rezisténsia. Bainhira nia rede inimigu persege, nia haruka informasaun ba li’ur liuhusi padre Jesuita João Felgueiras no Martins.

Iha situasaun perigu nia laran, bainhira mane sira militár Indonézia deskonfi,  Merita Alves hamriik iha oin atu fó protesaun ba komandante no ativista klandestina sira. Merita Alves organiza tratamentu saúde ba komandante FALINTIL Maunana no tula komandante Neves hetan asisténsia médika iha klínika Motael ho doutor Daniel Murphy.

Militár Indonézia sempre mai ho stereotipe katak feto sira fraku, Merita hatudu katak pelu kontrariu husi pontu fraku nakfilak sai forsa feto nian. Bainhira mane sira persegue no inimigu deskonfia, feto sira mak hamriik iha oin.

Iha tinan-1997-1998, Merita Alves sai figura prinsipál ida husi sira seluk ba reorganizasaun FRETILIN no OPMT tuir orientasaun husi Comité Diretiva Fretilin.

Bainhira Lú Olo, Ran Nakali, Soekarno no Gamoloi hala’o atividade polítika iha Díli, iha 1998, Merita Alves ho nia família mak fó protesaun, organiza enkontru klandestina no apoiu lojístika.

Tan nia envolvimentu polítika, Merita Alves partisipa iha Konferensia Kuadrus FRETILIN iha Sydney iha 1988, Konferensia partidu nian ba dahuluk hafoin 1977.

Merita Alves sai membru Frente Polítika Interna hodi partisipa ativamente mobiliza feto no mane kampaña referendum atu timoroan hili rejeita pakote autonomia ho Indonézia nu’udar dalan ba independénsia.

Iha 2001 sai membru Assembleia Konstituinte no deputada ba primeira lejislatura husi 2002-2007.

Iha tinan-2001-2021 sai membru Comité Central da FRETILIN. Koordenadora Jerál ba Restruturasaun OPMT.  Eleita nu’udar Sekretária Jerál OPMT  ho mandatu dalatolu tutuir malu, husi 2006-2011, 2011-2016 no 2016-2021.

Nu’udar lider organizasaun pioneira ba luta emansipasaun feto, Merita preokupa tebes ho konservasaun memória luta feto nia. Iha tinan-2010, iha ninia lideransa konsege halibur lider nasionál hotu-hotu atu apoiu projetu hakerek livru partisipasaun feto iha luta libertasaun nasionál.  Projetu ne’e konsege grava sasin sira nia memória kona-ba luta libertasaun nasionál liu ema na’in-800 husi munisípiu hotu ne’ebé nia arkivu sei asesivel ba públiku.

Merita Alves hamutuk lideres OPMT nian mai kedas hanoin klaru katak istória feto iha luta libertasaun nasionál timoroan mak hakerek no uza projetu ne’e atu transfere koñesimentu istória rezisténsia nian husi jerasaun 1975 nian ba jerasaun foun sira.

Dalabarak husu nia atu bele lee filafali transkrisaun entrevista maibé nia nunka hakarak lee tanba sente moe. Nia razaun nia rejeita atu lee tanba nia hateten la’ós nia mesak mak luta, maibé Povu mak luta.  Ne’e hatudu nia espíritu luta koletivismu nian, la hatuur nia an aas liu sira seluk hodi defende nia interese pesoal.  Maibé fiar iha luta koletivu povu nian ne’ebé nia komunga tiha ona.  Eroina nunka mate. Merita Alves, Prezente!

Print Friendly, PDF & Email

LEAVE A REPLY

Please enter your comment!
Please enter your name here