Home Notisia SS, Duarte Uza Rai Rohan Iha Hera Kuda Modo, Dalan Alternativa Hodi...

SS, Duarte Uza Rai Rohan Iha Hera Kuda Modo, Dalan Alternativa Hodi Hetan Osan

634
0
Estudante UNTL Duarte da Costa iha kanteiru kuda modo. [Foto: Francisco JDA | 26.05.2021]

Reportajen Francisco JDA

Implementasaun Serka Sanitaria (SS) no Konfinamentu Obrigatoriu (KO) ne’e to’o agora sei kontinua, tanba impaktu hosi surtu COVID-19. Situasaun ne’e hamosu obstaklu, liu-liu ba estudante sira tanba susar asesu eskola online, susar selu kost no prejudika atividade negósiu kiik sira atu hetan rendimentu diak.

Jornalista Neon Metin hakbesik no dadalia ho estudante Universidade Nasional Timor Lorosa’e (UNTL), Duarte da Costa ne’ebe eskola iha departamentu Mekánika, mai hosi municipio Covalima, ba  Neon Metin nia haktui situasaun ne’ebé nia hasoru  tanba dook hosi inan aman, susar tebes atu selu kost.

Maibe situasuan ne’ebé Duarte hasoru, la hamate nia vontade atu buka solusaun, oinsá bele hatutan nia moris. Nia foti inisiativa uza rai pedasuk iha Hera, hodi kuda modo, nune’e bele aguenta ba nia moris lor-loron.

“Ha’u kuda modo iha ne’e tanba araska los ona, osan atu kirim hosi Covalima mai labele, entaun rai nain sira iha Hera, hanoin ha’u no fo rai oituan atu kuda modo, nune’e bele hetan osan oituan ba seluk kost no hahán nian. Maske modo sira ne’e ha’u foin kuda no sei kiik, ema seidauk sosa hein katak ema sosa, entaun osan sira ne’e bele selu ba kost”, hateten Estudante UNTL Duarte da Costa Pereira, iha Kanteiru Hera,26/05

Halao knaar nudar estudante iha UNTL, Duarte mos iha esperiénsia moris hanesan agrikultór, nune’e abilidade ne’ebe nia iha, bele sai dalan alternativa hodi satan nia situasaun. Ho esperansa boot modo sira ne’ebe nia kuda rasik, ema bele mai sosa.

“Hetan osan susar tebes, tan dook hosi inan aman, hau labele tuir eskola online tanba laiha telefone”, dehan Duarte.

Duarte uza tempu ne’ebe iha, nune’e iha dader hamoos no rega modo, nune’e bainhira moda ne’e folin, bele tulun nia hodi sosa telefone atu tuir eskola online.

Duarte husu ba governu hodi loke dalan, nune’e inan aman sira bele halo movimentu hodi transfere osan ba sira, ne’ebe kontinua estudu iha Dili.

Print Friendly, PDF & Email

LEAVE A REPLY

Please enter your comment!
Please enter your name here