Reportajen David da Costa
Prezidente Repúblika (PR) José Ramos-Horta senti mate eis-Prezidente Repúblika no Prezidente FRETILIN, Dr. Francisco Guterres Lú Olo nu’udar lakon boot ida ba Timor-Leste, tanba nia kontribuisaun importante iha Lúta ba independénsia no iha prosesu konstrusaun Estadu durante tinan barak.
Iha deklarasaun ofisiál husi pagina Facebook Prezidente Repúblika, José Ramos-Horta hato’o sentidu kondolénsia sinseru ba família, lideransa, kuadru no militante FRETILIN sira tanba mate eis-Prezidente Repúblika no Prezidente FRETILIN, Dr. Francisco Guterres Lú Olo, ne’ebé mate iha ospitál iha Malázia.
Bainhira nia simu notísia kona-ba mate eis Prezidente Repúblika no atual Prezidente Partidu FRETILIN, Dr. Francisco Guterres Lú Olo, ho triste tebes no konsidera lakon ne’e nu’udar perda boot ida ba Nasaun Timor-Leste.
“Ha’u simu notísia ne’e ho triste tebes no konsidera eis Prezidente Repúblika Francisco Guterres Lú Olo nia mate nu’udar lakon boot ida ba Nasaun,” dehan José Ramos-Horta iha nia pagina Facebook ofisial ne’ebe neon Metin asesu ohin, Segunda 22/06.
Xefe estadu ne’e hateten, durante nia vizita ba Malázia entre loron 13 to’o 16 Juñu 2026, nia ba vizita Lú Olo iha unidade kuidadu intensivu ospitál nian. Iha okaziaun ne’e, nia rona relatóriu médiku hosi doutór Timoroan sira no ko’alia ho kaben Lú Olo, Cidália Lopes Nobre Mouzinho Guterres, kona-ba gravidade hosi nia kondisaun saúde.
Ramos-Horta esplika, tanba respeitu ba privasidade pasiente Dr. Francisco Guterres Lú Olo no família nian, entaun nia la fó detalle kona-ba kondisaun klínika Lú Olo nian ba média bainhira fila mai Dili.
Xefe Estadu mós revela katak nia fahe informasaun kona-ba kondisaun krítiku Lú Olo nian ho lideransa másimu Partidu FRETILIN nian. Tanba Francisco Guterres Lú Olo nu’udar patriota boot ida no líder sentrál iha Lúta libertasaun nasional, além de kaer kargu aas hotu-hotu iha Estadu no lidera partidu istóriku FRETILIN.
“Prezidente Francisco Guterres Lú Olo nu’udar patriota boot ida, líder sentrál ida ba Lúta libertasaun nian, líder partidu istóriku FRETILIN nian, no kaer kargu aas hotu-hotu Estadu nian,” Ramos-Horta dehan.
Maibé atu fasilita prosesu repatriamentu mate isin, Xefe Estadu hateten katak nia kontakta ona Embaixada Timor-Leste iha Malázia atu halo koordenasaun ho família no instituisaun estadu sira. Nia mós kontakta Aero Dili hodi prepara voo espesiál ida ba lori mate isin no membru família sira mai Timor-Leste.
Prezidénsia Repúblika afirma katak sei kontinua halo koordenasaun ho órgaun Estadu sira seLúk hodi fó apoiu tomak no onra Estadu ba eis-Prezidente Repúblika Francisco Guterres Lú Olo.
Mate Francisco Guterres Lú Olo marka lakon ida boot ba Timor-Leste, tanba nia kontribuisaun importante iha Lúta ba independénsia no iha prosesu konstrusaun Estadu durante tinan barak.
