Home EduTek SS, Konsellu Profesór EBCH Hera La Aseita Estudante Halo Teste Formativu Iha...

SS, Konsellu Profesór EBCH Hera La Aseita Estudante Halo Teste Formativu Iha Uma

664
0
Eskola iha Hera. [Foto: Francisco JDA | 26.05.2021]

Reportajen Francisco JDA

Surtu COVID-19 nia númeru ne’ebe kada loron sae, fo impaktu boot ba seitor edukasaun, maske governu kria programa eskola hosi uma, liu hosi programa televisaun no eskola balun kontinua halo eskola liu hosi online, maibe karik la atinje 100% tanba ema barak mos susar atu halao sira nia eskola hosi uma.

Konfinamentu Obrigatóriu (KO) no Serka Sanitaria (SS) ne’ebé kontinua implementa sai obstákulu boot ba estudante sira atu partisipa iha prosesu aprendizajen. Neon Metin hakat besik ba Eskola Bázika Central Hera (EBCH), ne’ebe hapara atividade eskola hahu kedas hosi loron 7 Marsu, hafoin governu deside konfinamentu obrigatóriu, no manorin sira deside distribui materia ka livru ba estudante sira estuda iha uma.

Neon Metin dadalia ho Diretor Eskola Bázika Central Hera, Joao Reis da Cruz informa katak, situasaun konfinamentu obrigatóriu, manorin sira kontinua hein estudante sira iha eskola, tanba materia ba teste formativu nia hanesan pergunta no ezersísiu balun manorin sira prepara hela atu distribui ba estudante,   maibé bazeia ba desizaun Konsellu Profesór la aseita atu teste formativu ne’e estudante  halo iha uma razaun katak ema seluk mak prienxe fali pergunta sira.

“Ami la aseita teste formativu ne’e distribui ba labarik sira atu halo iha uma no entrega ba eskola, tanba bele mosu espekulasaun oin-oin, bele ema seluk ka inan aman mak halo, tanba ne’e agora ne’e ami stand by iha eskola, nune’e alunu se de’it mak mai, bainhira realiza eskola Pontus ezame no matéria sira preparadu ,maibé halo iha eskola no la halo iha uma,” dehan Diretor eskola Bázika Central Hera, Joao Reis da Cruz iha nia Knaar fatin Hera, 26/05

Diretor Eskola ne’e dehan, molok tama ba iha Serka Sanitaria materia distribui antes ona, maibé to’o agora estudante seidauk mosu iha eskola, maibé manorin sira kontinua hein estudante sira iha eskola, bainhira eskola hahu no halo ezame formativu, eskola ne’e garante ba distansiamentu fíziku, uza maskra no sei prepara bee no sabaun ba estudante sira.

Edukasaun sai setór importante, hodi prepara estudante sira nia futuru ho kualidade, nune’e sira bele kontribui ba dezenvolvimentu, maibe bainhira los mak sira bele hahu fali prosesu aprendizajem tuir dalan normal, ho situasaun balun ne’ebe la apoiu sira atu estuda ho diak hosi uma. Espera bele iha solusaun, nune’e estudante sira bele hakat lolo liman hodi kaer fitun, hodi atinje sira nia mehi, no edukasaun labele mate tanba COVID

Print Friendly, PDF & Email

LEAVE A REPLY

Please enter your comment!
Please enter your name here