Reportajen Silvino Freitas
Relasiona ho video neebe viral iha media social kona-ba sidadaun Indonesia feto ida neebe ninia pasaporte liu prazu hodi pesoal migrasaun husik liu fronteira, nunee servisu migrasaun forma ona ekipa hodi halo investigasaun ba kestaun refere, tanba husi parte servisu migrasaun simu ona relatorio no identifika ona ofisial migrasaun ida maka komete aktu iregularidade refere, nunee sira buka tan evidensia seluk atu prova verdade husi video refere, nunee mos sei koordena ho embaixada indonezia atu bele hetan tan evidensia seluk husi pesoal neebe publika video refere.
Diretora Ezekutiva Servisu Migrasaun Natercia Martins dehan, informasaun neebe viral iha media social servisu migrasaun hola kedas konsiderasaun boot orienta kedas diretora relevantes para hahu forma ona ekipa investigador ida dadaun nee sira halo hela preparasaun atu desloka ba terenu rekolla informasaun hotu konaba akontesimentu nee, iregualirdade nee akontese iha dia 27 fulan kotuk maibe foin mak fo sai iha media hodi ema fahe iha media social nunee importante tebes migrasaun rasik, nunee sira konsidera problema refere importante a sira atu hadia no apoiu performa servisu instituisaun nian
“Fo hatene ba publiku atu halo nafatin observasaun no fo informasaun mai iha migrasaun atu nunee fo nafatin atensaun ba servisu sira neebe ita nia membru sira halo, nunee informasun neebe hatoo mai ami konsidera ona forma ona ekipa ida no hahu halo prosesu ida nee depois prosesu nee nia rohan ami sei informa fali ba iha publiku atu bele akompana” dehan Diretora Ezekutiva Servisu Migrasaun Natercia Martins ba jornalista sira iha MI Kaikoli, (23/02).
Nia dehan tan, liuhusi evidensia neebe ita rekolla sai duni prova ba ninia aktu ida nee mak sei kondena ho lei neebe mak vigor iha migrasaun lei funsaun publika nian no publiku sei hatene nia rezultadu final, tuir relatorio husi postu aprezenta ona, nunee relatorio nee mak sei sai referensia ba ekipa nee buka tuir verasidade husi polemika refere tanba nee sira sei buka fali informasaun husi parte relevante sira seluk atu bele justifika relatorio ida nee nia verasidade.
“Relatorio neebe ita simu iha autor nee ida deit maka husi informasaun neebe viral nee mensiona ita deskonfia autor nee nain ida, maibe ita sei loke prosesu ida nee rekolla tan evidensia ita sei halo koordenasaun mos ho embaixada indonesia liuhusi sira nia adidu migrasaun sir abele fo apoiu ba ita atu bele hetan evidensia husi pesoal ida neebe maka publika nee” konklui Diretora Ezekutiva Servisu Migrasaun Natercia Martins.
