Reportajen Silvino Freitas
Komunidade suku Casa Munisípiu Ainaru difisil tebes atu asesu bee moos iha tempu bailoron, tanba bee sira maran no tenke la’o dook hafoin lalin bee moos ba sira nia hela fatin, nomós iha agrikultura natar barak mak abandona tanba problema irigasaun ne’ebé ladi’ak.
Longuinhos Araújo Xefe Suku Casa hateten, durante ne’e iha aldeia Lailima bairu Fatunaro iha xefe família 74 populasaun hamutuk 324 ida ne’e mak seida’uk asesu ba bee moos, dadaun ne’e sira sei konsumu hela bee mota wainhira mota tuun sira ba iha mota hodi hetan bee moos.
“Kuandu iha bailoron naruk sira araska depois ninia distánsia husi casa villa iha 5 kilometru, komunidade balun ne’ebé iha motor bele lalin ho motor maibé laiha ne’e susar lós, sira mós uza hantractor hodi halo ba karosa lalin bee” dehan xefe suku Longuinhos iha Salaun City8 Manleuana Dili, (22/03).
Nia dehan, iha aldeia Botama nian xefe família 75 populasaun hamutuk 315 ida ne’e asesu tiha ona ba bee moos, maibé bailoron naruk bee matan ne’e maran, nune’e atu asesu fali ba iha bee moos tenke mai kuru iha casa villa ho distánsia 2 kilometru, balun lori motor no kuda mak lalin.
“Iha seitor agrikultura mos komunidade sei uza hela irigasaun manual, bainhira udan mota boot taka hotu irigasaun sira, nune’e sira presiza kee fali bainhira mota para” nia lamenta.
Longuinhos esplika katak, natar sira suku casa iha 180 hektar ne’e prezisa irigasaun ne’ebé di’ak tanba dadaun ne’e uza de’it manual, dadaun ne’e mós mota beluli mós fó ameasa ba natar fatin dadaun ne’e halo de’it natar 40 hektar, restu ne’e seida’uk halo tanba mota fó ameasa.
Entretantu natar fatin iha Loibolo mós presiza halo irigasaun tanba natar iha area ne’e ho hektar 203, komunidade ne’ebé iha forsa mak bele halo laiha forsa la halo tanba bee lori manual de’it, nune’e iha natar barak mak sei abandona tanba problema irigasaun mak difikulta tebes sira atu halo natar sira.
