Reportajen David da Costa
Eminénsia Virgílio Cardeal do Carmo da Silva SDB, husu ba partidu politiku sira ne’ebé maka atu konkorre iha eleisaun parlamentár tinan ne’e, tenke sai konstrutora ba pás no estabilidade iha Timor-Leste. Tanba ne’e partidu polítiku sira bainhira halo kampaña tenke hatuur programa polítiku ida ne’ebé di’ak ba ema hotu nian.
“Igreja apela ba sira hotu, ne’ebé maka konkorre daudaun iha eleisaun jerál ida ne’e, ba responsavel partidu sira hotu no ba ema hotu ne’ebé halibur malu iha partidu ruma, atu sai konstrutores da pás, konsidera malu nu’udar manalin no inan feton. Hatuur programa politika ida ne’ebé buka bem komun ba Timoroan hotu nian, eduka povu atu moris espíritu demokratiku halo boot iha imi nia fuan, espiritu solidaridade nian hodi hamate kompetisaun no rivalidade ne’ebé akontese ona iha pasadu no ita lakohi aat ida ne’e kontinua akontese iha jerasaun tuir mai,” dehan Eminénsia Virgílio Cardeal do Carmo da Silva SDB, bainhira sai oradór iha Konferénsia Nasionál ba eleisaun pasifika, iha Salaun Lalini Larigutu CNE, Kuarta 12/04.
Nia haktuir papél igreja Katolika Timor ba identifikasaun damen fraternidade umana no demokrasia ne’e, Igreja iha Timor ho espiritu simularidade nian la’o hamutuk ho igreja universál nia esfostu, konstante atu hari no hametin damen ida ne’ebé solida.
Tanba ne’e igreja atu rona iha nia konstrusaun estadu afirmasaun nia identidade povu no rai Timor nian, Amo Bispo sira hamutuk ho nain luluik sira, misionariu sira, relijioju konsagradu no konsagrada hamutuk ho sarani diak sira kontinua kontribui nafatin ba sosiedade ida ne’ebé pasifika no fraternu iha kontekstu pais demokratiku Timor-Leste ninian.
Nia hatutan rekoñese katak empeñu ba konsolidasaun ba dame fraternidade no demokrasia presiza hatur iha espíritu de diálogu, hodi kolaborasaun, unidade no solidariedade entre igreja ho estadu.
Entretantu partidu politiku sira ne’ebé maka sei konkorre iha eleisaun parlamentár tinan ne’e maka Partidu PDN, Partidu PLPA, Partidu PLP, Partidu PD, Partidu KHUNTO, Partidu Os Verdes de Timor, Partidu UDT, Partidu PUDD, Partidu PR, Partidu UNDERTIM, Partidu FRETILIN, Partidu CNRT, Partidu CASDT, Partidu MPLP, Partidu PST, Partidu PDC no ikus liu maka Partidu APMT.
