Reportajen Silvino Freitas
Governu liuhusi Sekretária Estadu Formasaun Profisionál no Empregu (SEFOPE) asina deklarasaun servisu ho traballadór Timoroan 65 ne’ebé atu ba servisu iha Korea do Sul iha area peska nian, nune’e konteúdu husi deklarasaun ne’e maka atu bele hetan aseitasaun entre família no estadu ba pontu kompremitidu sira ne’ebé bele halo no labele halo durante hala’o servisu iha Korea do Sul, nune’e mós responsabilidade morál atu haree malu nu’udar Timoroan, hases interese pesoál no grupu durante hala’o servisu iha ema nia rain.
Diretór Jerál SEFOPE Paulo Alves hateten, governu asina deklarasaun ho traballadór 65 ne’ebé atu hala’o servisu iha Korea do Sul husi deklarasaun ne’e atu sira bele iha kompremitidu ba sira nia hahalok ba asaun ne’ebé bele halo no asaun ne’ebé labele halo durante tinan 3 hala’o servisu iha Korea do Sul, nune’e karik sira hala’o asaun ne’ebé kontra pontu aseitasaun sira ne’e bele fó sansaun ba sira.
“Programa ida asina deklarasaun ne’e nune’e antes sira ba Korea do Sul karik tanba iha pontus sira ne’ebé hakerek iha deklarasaun ne’e saida mak sira bele halo no saida mak sira labele halo bainhira sira to’o iha korea, karik sira komete ruma karik maka bazeia ba deklarasaun nee mak ita bele halo asaun ruma ba sira liuhusi ita nia adidu no embaixada neebe maka dadaun nee iha Korea do Sul” dehan DJ Paul hafoin asina deklarasaun ho trabalador sira iha timor-lodge Dili, (16/06).
Fatin hanesan SEFOPE Alarico do Rosario apela ba traballador sira katak durante hala’o servisu iha ema nia rai tenke kuidadu malu no tau interese grupu nian iha fatin seluk, nune’e haree no konsidera malu nuudar timoroan, nuudar timoroan tenke asegura malu haree malu di’ak, labele lori ita nia grupu ba ka’or malu iha ema nian rain nune’e ba sira neebe tuir organizasaun diferente nomos labele hasee malu ba organizasaun tanba tuir nee direitu ema idak-idak nian.
“Labele hasee sira katak sira tuir organizasaun ne’e ladi’ak maibé ne’e sira nia direitu utiliza maka dalaruma sala, maibé loron ida sira sei komprende ida nee” dehan Alarico.
Nia dehan, nuudar Timoroan ita nia prezensa iha ema nia rain tenke hadomi ita nia nasaun, ita nia bandeira ne’ebé uza hodi halo juramentu, tanba ne’e hadomi ita nia rain no kultura atu ita bele kontinua unidade iha ema nia rain, tanba ba hala’o servisu iha ema nia rain atu hadi’a moris nesesidade no vida família nian, hadi’a uma sira ne’ebé durante ne’e hela fila mai Timor Leste tenke ema ida halo uma foun ida iha nia hela fatin.
