Reportajen Joanina Casemiro
Ministériu ba Asuntu Parlamentar no Komunikasaun Sosial (MAPKOMS) hala’o serimónia agradesementu no jantar konfraternizasaun hamutuk ho na’in ba media sira, journalista no orgaun komunikasaun sosial hotu, ne’ebé durante ne’e halo kobertura ba atividade hotu hosi mandatu VIII governu nian. Alein de ne’e distribui mos sertifikadu apresiasaun ba reprezentante media sira.
Ministru MAPKOMS, Francisco Martins da Costa Pereira Jerónimo lori governu nia naran, MAPKOMS rasik, Sekretáriu Estadu Komunikasaun Sosial no VIII governu tomak ne’ebé lidera hosi Primeiru Ministru Taur Matan Ruak ba jornalista sira no media sira hotu ne’ebé hala’o kobertura durante sira nia mandatu.
“Ha’u hakarak agradese ba media sira hotu kedas, ba Jornalista sira hotu ba kontribuisaun ne’ebé boot tebes bele ajuda governu iha tempu difisil no tempu ne’ebé mai dadauk to’o ita nia eleisaun dala rua hetan susesu boot tebe-tebes. Ba ida ne’e ha’u hanoin buat ne’ebé ita boot sira halo la saugati tanba ita boot sira halo ho esforsu, ita hotu hetan atinjimentu ne’ebé di’ak nune’e iha eleisaun dala rua la’o ho di’ak hakmatek.” Dehan Ministru MAPKOMS iha nia Diskursu ba serimónia agradesimentu no jantar konfraternizasaun iha Salaun Xanana Sport Center, 16/07.
Nia hatutan nune’e mos problema Covid-19 nia mos ita hasoru maibé konsege ultrapasa tanba apoiu hosi media hotu-hotu ne’ebé mak ajuda governu oinsá mak halo sosializasaun atu lori informasaun ho lolos ba komunidade sira ikus mai ema iha susesu boot, ida ne’ebé bele dehan katak Timor-Leste ho rekurkus la boot maibé bele fo soluzaun ba problema Covid-19 ne’ebé iha mundu.
Iha fatin hanesan reprezentante media privadu iha serimónia ne’e, Salvador J. X. Soares hateten ohin mai hamutuk ho MAPKOMS hodi hala’o serimónia agradesimentu ba aktividade hotu mak media sira halo, hodi media privadu nia naran hakarak hato’o agradesimentu ba MAPKOMS ne’ebé durante ne’e mos iha apoiu ba aktividade media nian. “Media ne’e hanesan komponente importante tebes iha hosi konstituisaun estadu, ha’u hanoin oprtunidade ne’e importante tebes mai ita hotu, ami agradese tebes ohin kalan ne’e.”
Nune’e mos Daky Belo, reprezenta hosi media estatal agradese ba MAPKOMS durante mandatu tinan tolu bele ho dezafiu maibé bele ultrapasa ho aktividade sira ne’ebé la’o
“La sente katak iha ita nia mandatu tinan tolu iha buat balu konsege utrapasa no iha buat balu ita la konsege utrapasa signifika katak ita tenke halo esforsu ba oin atu bele responde ba iha situasaun aktual liu-liu ba puybliku ba iha informasaun kualker aktividade. Tanba ida ne’e mos ha’u hanoin katak buat balu ami konta ho ita bo’ot nian ita ho ita buka konstituisional liu hosi ita boot nia servisu iha dezenvolvimentu balu ne’ebé hatudu ona, hanesan media estatal ami koko la’o ho rekursu ne’ebé mak iha maibé iha ita boot nia mandatu la konsege halo tanba kestaun tékniku, kestaun polítiku, kestaun rekursu iha instituisaun estadu liu-liu governu foun bele mos kontinua dezenvolve ba oin.”
