Reportajen David Da Costa
Reabilitasaun estrada iha postu administrativu Quelicai Munisipiu Baucau ba Iha postu administrativu Ossu munisípiu Viqueque no Laga ba iha Baguia, komunidade sira ne’ebé maka afeta ba projetu reabilitasaun ne’e, Ministru Obras Publika (MOP) halo ona transferénsia osan ba iha Banku Nasionál Komersiu Timor-Leste (BNCTL), no hein de’it halo pagamentu ba komunidade sira ne’ebé afetadu.
Ministru Obras Publika (MOP), Abel Pires, agradese ba komunidade nia partisipasaun iha prosesu reabilitasaun estrada Quelicai ba Ossu, no Laga ba Baguia, tanba liña impedimentu husi komunidade sira bainhira halo reabilitasaun ba iha estrada sira ne’e, maibé MOP sei selu no halo transferénsia ba iha BNCTL hodi halo pagamentu
“Agora iha ona ezekusaun, tanba Primeiru Ministru lansa ona, ne’e laiha tan buat ruma atu impede,” dehan Ministru Abel hafoin ramata enkontru ho Primeiru Ministru Taur Matan Ruak iha Palásiu Governu, Sexta 20/01.
Entretantu reabilitasaun estrada husi Quelicai Uai-aka ba iha Ossu ne’e, ho ninia distánsia kilómetru 22,7 ne’ebe maka kompostu hosi asphalt metru 4, alargamentu metru ida (1), no ninia ombru metru rua (2).
Diresaun Nasionál Estrada, Ponte no Kontrolu Cheias hosi Ministériu Obra Publiku ( MOP ) aloka orsamentu hosi fundu infraestrutura tinan fiskál 2022 hamutuk $16.547.661,76.
Durasaun ba reabilitasaun estrada Quelicai ba iha Ossu fulan 18 ne’ebé responsável hosi kompañia Chongqing International Construction, no supervizaun hosi kompaña PY konsep perunding Sdn Bhd hosi Malázia ho durasaun kontratu fulan-18 ho totál orsamentu $452.122.00.
Nune’e mós husi estrada diresaun Laga – Baguia purvolta kilómetru 38 ho luan metru neen ,ne’ebé sei responsavel hosi kompañia Norinco internasional cooporation, ho tipu reabilitasaun ho totál orsamentu millaun $21.7.
