Reportazen Francisco JDA
Reprezentante husi bankada parlamentar FRETILIN, PLP no KHUNTO hatama ona keixa ida ba Ministeriu Públiku (MP) hasoru organizasaun Brigada Negra, ba sira nia áktu deklarasaun ne’ebé ameasa orgaun soberania Parlamentu Nasional iha loron 15 Maiu 2020 liu ba.
Liu hosi komunikadu imprensa ne’ebe mak Neon Metin asesu iha loron 16/05, esplika katak deklaraun hosi Brigada Negra ne’ebe deklara “karik vices sira brani halo duni iha segunda mai ne’e, maka ami avisa, ita bo’ot sira loke dalan ona ba ami tomak atu la respeita tan leis no orgauns de soberania. Ami sei mobiliza povo atu okupa Kadeiras iha Parlamento Nacional, to’o Presidente Republika dekreta Disolusaun Parlamento Nacional no konvoka Eleisaun Antesipada.”
Relasiona ona ho deklarasaun ida ne’e, Bankada Parlamentar FRETILIN, PLP no KHUNTO konsidera nudar krimi públiku no krime hasoru estadu tamba halo koasaun hasoru Orgaun Soberania Estadu nian, Parlamentu Nasional no tenta perturba ninia funsionamentu normal.
Iha komunikadu imprensa deputadu sira husi bankada parlamentar tolu ne’e hato’o keixa ba Prokurador Jeral da Repúblika, atu hahu prosedimentu kriminal no loke invetigasaun ba krimi hasoru Orgaun Soberania Estadu ida ne’e.