Reportajen David da Costa
Reabilitasaun estrada iha postu administrativu Quelicai Munisípiu Baucau ba iha postu administrativu Ossu, munisípiu Viqueque no Laga ba iha Baguia antes ne’e Primeiru Ministru (PM) halo ona Lansamentu ona, maibe Ministru Obras Publiku (MOP), husu nafatin ba komunidade pasiénsia hodi hein tanba prosesu ne’e la’o hela.
Ministru Obras Publiku (MOP), Abel Pires hateten reabilitasaun estrada Quelicai ba iha Ossu no Laga ba iha Baguia, agora kampaña iha ne’ebá hela no halo identifikasaun, oinsá fatin atu tau rai henek iha fatin ne’ebá, fatin atu foti fatuk, nomós ekipamentu tuir dalan hela.
“Hau komunika diretamente ho ita nia destekata sira, no mós lista projetu husi kompañia nian, progresu ne’e lao hela, hanesan mos hodi bainrua hau hato’o laiha impedimentu buat ruma,” dehan Mop Abel hafoin ramata enkontru ho PM Taur Matan Ruak Iha Palásiu Governu, Sexta 20/01.
Nune’e mós Ministru Obras Pubilika agradese ba progresu tomak, tanba hein tama iha Natal tinan ne’e no tinan foun estrada postu Quelicai ba iha Ossu no Laga ba iha Baguia sei sai furak liu tan, ne’ebe husu ba inan aman sira pasiénsia hodi hein, maske hein ona dezde ukun an, tanba fulan ida rua reabilitasaun estrada ne’e sei la’o.
“Ami agradese ba progresu tomak, hein natal tinan foun 2024, natal 2023 nian, situasaun ne’ebá sei sai oin seluk loos. Favor ida pasiénsia oituan, ita hein ona prosesu ne’e dezde ita ukun an, hau hanoin hau nian inan aman sira hein tan fulan ida rua para situasaun ne’e la’o diak, ne’e la’os problema,‘ nia esplika.
Entretantu reabilitasaun estrada husi Quelicai Uai-aka ba iha Ossu ne’e, ho ninia distánsia kilómetru 22,7 ne’ebé maka kompostu hosi asphalt metru 4, alargamentu metru ida (1), no ninia ombru metru rua (2).
Diresaun Nasionál Estrada, Ponte no Kontrolu Cheias hosi Ministériu Obra Publiku ( MOP ) aloka orsamentu hosi fundu infraestrutura tinan fiskál 2022 hamutuk $ 16.547.661,76.
Durasaun ba reabilitasaun estrada Quelicai ba iha Ossu fulan 18, ne’ebé responsável hosi kompañia Chong-Qing Internasionál Construction no supervizaun hosi kompañia PY konsep perunding Sdn Bhd hosi Malázia ho durasaun kontratu kontratu fulan18 no totál orsamentu $452.122.00.
Nune’e mós husi estrada diresaun Laga-Baguia purvolta kilómetru 38 ho luan metru neen ne’ebé sei responsál hosi kompañia Norinco International Cooperation ho tipu reabilitasaun ho totál orsamentu millaun $ 21.7.
