Reportajen Silvino Freitas
Ministériu Saúde no Organizasaun Saúde Internasionál, Sao João de Deus realiza Forum Projetu Pilotu Implementa Padraun (PPIP), hodi habelar prevensaun no kontrolu moras infesaun liu husi fase-liman.
Prezidente Forum PPIP Abel Freitas Lay hateten, forum projeitu pilotu ba implementasaun padraun, forum ne’e iha ligasaun servisu ho Ministériu saúde hodi mellora servisu saúde atu implementa padraun iha ospitál hotu hahú iha HNGV no ospitál referál sira seluk.
“Projetu pilotu ida ne’e hahú ona ho pilotu ida iha HNGV iha tempu hirak liu ba, nune bele habelar koñesimentu kona-ba prevensaun no kontrolu moras infesaun ba moras hotu iha teritório nasionál” dehan Abel iha salaun City8 Dili, (12/04).
Nia dehan, iha tinan 2 liu ba implementa ona iha HNGV ba padraun ijene liman fase liman ho maneira ida ne’ebé di’ak, no mós ba ohin sei implementa tan iha ospitál referál Maubisse no karik iha susesu sei extende ba munisipiu sira hotu, hodi prevene no kontrolu ba moras infesaun sira.
“Ami foka liu ba fase liman antes atu atende ita nia pasiente sira iha ospitál, atu prevene moras sira ne’ebé pasiénte sira husi uma mai iha ospitál la hetan infection seluk maibé baixa hetan moras ruma, maibé ho implementa programa refere sei reduz” nia esplika.
Abel dehan tan, iha prosesu implementasaun ne’ebé hala’o ona iha rezultadu ne’ebé significante tebes, tanba daudaun ne’e mundu seidauk livre husi covid tanba ne’e presiza implementa tan atu bele iha ijene ne’ebé mós ba fase liman no disinfectasaun ba moras sira seluk.
Entretantu Diretór Gabiniete Garantia Kualidade Ministeriu Saúde Feliciano Pinto hateten, projeitu pilotu ne’e hanesan loke dalan ba programa sira ne’ebé ninia sustentabilidade di’ak, maski nia pilotu hotu ona maibé sustentabilidade ne’e tenke asegura.
“Konseitu pilotu ne’ebé di’ak ita bele muda fali ba iha konseitu programatiku, nune’e bele sai tradisaun ba fatin servisu nian, maski projetu ne’e jerál maibé ita foka uluk ba fase liman” dehan Feliciano iha salaun City8 Dili, (12/04).
Nia hatutan, projetu pilotu kona-ba fase liman ne’e importante tebes tanba ne’e sei kontinua atu sai programa importante iha area saúde nian, hodi muda ba konseitu programatiku saúde nian.
Nune’e forum PPIP refere hetan apoiu fundus husi organizasaun Sao João de Deus Saúde Internasionál parseria ho diresaun nasionál apoiu ospitalar no gabinete garantia kualidade saúde husi ministeriu saúde nian.
