Reportajen David da Costa
Konsellu Imprensa (KI) husu ba jornalista no media sira, ne’ebé maka halo kobertura ba kampaña partidu politiku sira, hatudu imparsialidade bainhira halo kobertura iha kampaña eleisaun parlamentár, tanba imparsialidade maka bele kontribui ba profisionalizmu jornalista nian.
Reprezentante Prezidente Konsellu Imprensa, Konselleiru Espedito Dias Ximenes, hateten, partidu polítiku sira hahú ona halo sira nia kampaña to’o iha 18 Maiu, tanba ne’e espera katak, iha kampaña to’o mai iha forma governasaun ne’e produtu jornalista sira tuir duni kode etika jornalizmu no imparsialidade.
“Ita hein katak produtu Jornalista nian husi kampaña, tempu votasaun to’o mai iha forma governasaun foun ita sei hala’o ita nia knaar tuir etika jornalismu nian ne’ebé fó ba ita. Tanba KI iha kedas elisaun prezidensiál hasai ona matadalan ida ita bele kaer hanesan guiaun, atu nune’e ita hala’o ita nia knaar ho imparsiál ita laiha sadere ba partudu A ka B, maibe ita la’o tuir ita nia knaar ne’ebé hakerek iha ita nia kode etika jornalista nian,” dehan Espidito liuhusi Komferensia Imprensa, iha salaun KI Kintal Boot, Kuarta 19/04.
Iha fatin hanesan Konselleiru Francisco Simão Belo hateten, fó hanoin ba kolega jornalista sira katak, kontinua tane kode etika jornalistika nian, bainhira halo kobertura ba kampaña elisaun parlamentár hodi nune’e labele hatudu halis ba partidu ida no halis ba lider partidu balun, tanba imparsialidade ne’e importante.
“Ita nia profisionalizmu maka ita nia imparsialidade, kuandu ita halo knaar ho imparsialidade, ita sei kontribui ba ita nia profisionalizmu,” nia husu ba jornalista sira.