Reportajen Joselina dos Santos
Organizasaun Rezisténsia Nasionál dos Estudantes Timor-Leste (RENETIL), Servisu hamutuk Orgaun Tékniku Administrasaun Eleitoral (STAE), hodi fasilita Formasaun ba Observadór Feto na’in 98 no mane na’in 128 hamutuk 226, hetan fundus husi SASKAS Ho montante $ 15.000, objetivu husi atividade ne’e atu asegura observadór sira atu halo observasaun ba prosesu Kampaña Eleitóral 2023 nian.
Sekretariu Jerál Organizasaun Rezisténsia Nacional dos Estudantes Timor-Leste (RENETIL), Joaquim Fonseca “Russo” hatete, Observadór sira ne’e sei hola parte ba iha ekipa observadór RENETIL nian, entaun primeiru sira tenke hatene prosesu eleitóral. Nune’e iha formasaun loron dahuluk ne’e iha Introdusaun kona-ba RENETIL, Introdusaun ne’e presiza tanba sira sei ba hanesan ekipa RENETIL nian, entaun sira tenke koñese RENETIL hodi bele atua tuir prinsípiu RENETIL nian.
“Prosesu Eleitorál ne’e STAE mak fó formasaun maibe kona-ba RENETIL ne’e RENETIL rasik mak fó formasaun, primeiru ita tenke fó konfiansa tanba sira mai bazeia ba sira nia vontade rasik, tanba ne’e orseik Ami halo diskusaun ne’ebe abertu atu sira iha posibilidade hodi husu aspetu hotu kona-ba RENETIL nia prinsipiu, istória objetivu no nia servisu atu sira iha varajen naton atu garante katak sira nia hahalok ne’e konforme prinsipiu RENETIL nian”, Dehan, Sekretariu Jeral Russo, iha Salaun RENETIL Farol, kuarta 19/04.
Russo hatutan, Prosesu observasaun Eleitóral ne’e importante tebes ba validasaun rezultadu Eleitóral, Nune’e ikus ema bele hatene katak eleisaun ne’e la’o tuir prinsipiu lei sira ne’ebe vigora nia rezultadu validu ka lavalidu ne’e knaar boot ida mai hosi observasaun Eleitóral, entaun importante mak ekipa RENETIL nian garante katak sira halo tuir prinsipiu hanesan observadór diak iha imparsialidade objetividade banhira sira halo observasaun, entaun foti informasaun tuir loloos saida mak akontese hodi hato’o ba publiku nomos ba orgaun kompetente sira.
Iha fatin hanesan, Team Leader Observadór, Natalina Aparicio Rara hatete, objetivu fó formasaun ba observadór sira ne’e atu asegura no akompaña prosesu eleisaun ne’e la’o ho seguru tranparensia, nune’e espera katak labele ses husi saida mak povu nia hakarak.
“Observadór sira ne’e sei tun baze hodi halo observasaun, entaun bainhira sira identifika kauza saida mak iha sira sei haruka Mai iha Sekretariadu, hodi Sekretariadu haree husi dadus sira ne’e mak RENETIL sei hato’o ba Nai ulun sira nomos ba publik nune’e husu ba observadór sira tenke servisu ho kredibilidade atu ita bele hetan rezultadu pozitivu”, Nia Dehan.
