Reportajen David da Costa
Konsellu Imprensa (KI) sei halo esforsu makaas, atu nune’e jornalista sira iha media Públiku no Privadu sira hotu iha Timor-Leste, atu bele vota livre ka movel nafatin iha eleisaun parlamentár tinan ne’e.
Reprezentante Prezidente Konsellu Imprensa, Konselleiru Espedito Dias Ximenes, hateten Konsellu Imprensa nafatin halo esforsa makaas, hodi luta ba jornalista sira nia direitu, atu nune’e bele vota movel nafatin iha sentru votasaun sira ne’ebé maka jornalista sira halo kobertura. Tanba ne’e husu ba kolega sira hahú ohin ba oin, KI sei nafatin akompaña atividade sira ne’ebé maka kolega no media sira halo, no KI nafatin halo koordenasaun ho órgaun eleitorál konaba vota movel ida ne’e.
“Tanba ita sei iha fulan ida molok tama iha loron votasaun, tanba ne’e KI sei nafatin esforsu hodi luta makaas atu bele direitu ida ne’ebé jornalista media nain sira natin vota livre iha fatin kobertura,” dehan Espidito, liuhusi Konferénsia Imprensa, Iha salaun KI kintal Boot, Kuarta 19/04.
Nia hatutan, tanba haree observadór Nasionál hanesan ONG nia bele vota livre, nia halo observasaun iha estasaun votu sira nia bele vota livre, tanba sa maka jornalista labele, ida ne’e maka sai hanesan kestaun ne’ebé KI buka, atu bele nafatin halo advokasia no halo pedidu ba STAE no órgaun eleitorál sira, atu bele fó resposta ne’ebé pozitivu ba iha direitu jornalista sira atu bele vota movel iha sentru votasaun sira bainhira nia halo kobertura.
Tanba ne’e KI sei nafatin luta makaas, atu direitu vota livre ne’e bele alkansa.
Tanba iha eleisaun sira liu ba KI, sempre Ezije halo advokasia makaas kona-ba direitu jornalista sira nian, iha sira nia servisu jornalistiku, oinsá sira bele vota hanesan sidadaun iha fatin ne’ebé sira halo kobertura.
