Reportajen Umbelina dos Reis
Comissão Nasional das Eleições (CNE), halo konferénsia Imprensa hodi ko’alia kona ba “Balansu Kampaña Eleitorál” durante kampaña polítika, no CNE halo observasaun katak kampaña la’o di’ak maibé husu ba líder polítiku sira hadi’a linguanjen, no husu ba partidu hosi númeru 1 to’o 17 tenki eduka nia militante sira hodi nune’e labele hamosu krime durante kampaña eleitoral.
Prezidente CNE, Jose Agostinho da Costa Belo, liu hosi konferénsia imprensa hateten, durante CNE halo avaliasaun ba partidu polítiku 17 durante kampaña eleitoral la’o di’ak ona, maibé linguajen hosi partidu polítiku sira ladun edukativu.
“Tanba partidu CNRT halo kampaña iha munisípiu 2 hanesan Vikeke, Uatulari ho Baucau hetan tuda hosi ema deskoñesidu, rejultadu ema na’in 7 kanek, ho nune’e agora da-dauk polísia hamutuk ho CNE haree oinsá haree investigasaun, inklui mos partidu FRETILIN halo kampaña iha munisípiu Same hosi apoiantes balun ladun gosta malu entaun insulta malu”, dehan Prezidente CNE Jose Agostinho Belo ba Jornalista sira iha Salaun CNE, 24/04.
Nia dehan, agora da-dauk CNE rejista kazu ne’ebé bolu administrativu, ne’e CNE bele rezolve kazu ne’ebé kategoria ba krime mak haruka ba tribunál hodi rezolve.
“CNE fó hanoin ba líder partidu polítiku sira katak ba kampaña ne’e tuir regra, labele ba insulta malu, tanba Timor agora la hanesan Timor ida uluk, maibé nasaun Timor-Leste mós agora tama ona ba membru ASEAN no CPLP, nune’e husu ba líder partidu polítiku sira eduka militante sira labele insulta malu bei-beik durante kampaña.”
Nia informa, labarik barak mak partisipa iha kampaña eleitoral, maibé sira ba partisipa kampaña ho razaun katak laiha ema atu hare labarik entaun hakarak lakohi sira tenki lori sira nia oan ba tuir kampaña hotu i dala ruma labarik sira mak inisiativa rasik hodi partisipa duni kampaña tanba ho múzika ema barak mak partisipa, maibé CNE fó hatene ona ba seguransa katak, durante kampaña mak kareta isin ida iha de’it labarik entaun presija hola medida, tanba tuir lei no regulamentu labele utiliza labarik sira.
Kada vez partidu polítiku sira muda sira nia kalendáriu kampaña, maibé la informa ba CNE “maibé ami rejista iha Maliana sira ne’ebé mobiliza eleitor sira uza mos patrimóniu estadu, nune’e ami aproxima, fó notifikasaun tanba interpretasaun diferente konabá lei ne’e.”
Nia konklui katak, durante eleisaun loron 30 nia laran, tantu deputadu, administrador ou prezidente munisípiu la utiliza transporte estadu nian, “tanba iha fatin barak CNE hare katak deputadu balun uza transporte estadu nian ba tuir kampaña maibé ami sei halo notifikasaun ba parlamentu nasionál oinsá utilizasaun ba kareta estadu nian, tanba mina mai hosi estadu.”