Reportajen Umbelina dos Reis
Liu hosi konferénsia imprensa Centro Nacional Chega! (CNC), Porta-voz Pe. Juvito Rego de Jesus Araujo hateten, Eleisaun Parlamentár 2023 la’o di’ak tebes maibé ikus ne’e komesa mosu aktu violénsia, irregularidade durante kampaña partidu polítiku.
“Apresia ba líder partidu polítiku sira katak demokrasia la’o duni iha rai ne’e, maibé lamenta tebe-tebes ba hahalok no lala’ok sira ne’ebé la manifesta no orgullu ema internasional sira iha Timor, orgullu ne’ebé hosi ita nia lala’ok no hahalok ba rekonsilasaun hosi CAVR ne’e inspira nasaun lubuk ida mai iha Timor hodi konsulta husu tulun iha CAVR hodi partilla esperiénsia no halo rekonsiliasaun.” Dehan Pe.Juvito ba Jornalista sira iha Antigu Komarka Balide, 10/05.
Tanba Timor hakerek rekonsiliasaun hamutuk tahan 2500 (rihun rua atus lima), líder polítiku sira hasai buat hotu hosi ne’eba halo konfisaun no promesa katak ba oin ita dame malu la’os ibun tutun de’it, maibé tenki dame malu ho lala’ok, infelizmente violénsia ne’e la’o nafatin hela.
“Orgullu ba povu ne’ebé hatene nia lida pasadu, orgullu ba povu ne’ebé la hewai istóriku pasadu, no povu ne’ebé hetan dadur, tortura, no povu ne’ebé hetan kanek maibé hamnasa nafatin hateke ba oin. Orgullu ne’e labele sai de’it lia-fuan ou retórika maibé tenki ho hahalok.”
Nia dehan, CNC lamenta tebe-tebes atitude ho komportamentu ne’ebé la di’ak. Partidu polítiku sira ne’ebé sa’e ba palku leten haluhan aan, ko’alia arbiru no la aprezenta aan. Iha momentu ne’eba partidu polítiku sira iha CNE halo ona promete katak la halo violénsia fízika ou verbal, maibé sai ba li’ur kampaña nafatin la kontrola, nune’e husu ba líder partidu polítiku sira kontinua kontrola nia militante no simpatizante sira, tanba ema ne’ebé eskollidu iha palku leten ne’e atu eduka povu iha polítika la’os sai fali eskandalu iha palku leten.
Nia husu ba líder partidu polítiku sira presija kuda konsiénsia iha ida-idak nia fuan, infelizmente CNE nia lei mós fraku demais, nune’e ita presija reforsa CNE nia papel iha tempu kampaña, i CNE halo represaun direita hodi hapara kampaña polítika ne’ebé la edukativu ba pás.
“Eleisaun la’o dala barak ona iha ita nia rai, maibé ita presija hadi’a di’ak liu tan linguajen iha ita nia rai, tanba iha sivílizasaun ne’e tenki ko’alia lian ne’ebé di’ak. Se ema ruma mak ko’alia la di’ak presija keixa.”
Nia hatutan, bispu nia surat pastoral fó sai ona konaba eduka joven sira ba futuru, ba líder polítiku sira iha ona vagazen sufisiente ba istória, naha todan ne’ebé iha tinan 1975-1999 ne’e kasu tiha ona ba, agora tama ba faze istória foun.