Reportajen Joselina dos Santos
Comissão Nacional de Eleições (CNE), realiza Apuramentu Nasional no halo verifikasaun ba votus reklamadu husi 13 munisipiu, RAEOA no estranjeiru durante 72 oras nia laran. Ohin atinji ona 100 %, total votu reklamadu 515, votu nulu/inválidu 158, votu rezeitadu 1, votu branco 5, votu válidu 351.
Liuhosi Konferensia Imprensa, Komisaria CNE, Odete Maria Belo hateten, CNE hala’o nia funsaun, papel no kompeténsia haktuir atribuisaun iha artigu 65, nú. 6) Konstituisaun Repúblika Demokrátika Timor-Leste no artigu 8, Lei Nú. 5/2006, 28 Dezembru, ho redasaun alterasaun datoluk iha Lei Nú. 16/2021, 28 Jullu, Lei Nú 6/2006, 28 Dezembru, ho alterasaun dahat ba Lei Nú. 9/2017, artigiu 48 ne’ebe hatete katak, “CNE mak sei simu akta apuramentu munisipal no Rejiaun Autónomu Espesial Oecusse Ambeno (RAEOA) no akta apuramentu estranjeiru, prosede iha 72 oras nia laran hodi konfere ho reklamasaun sira.
“Apuramentu nasional CNE hala’o tuir prosedimentu tékniku sira hatu’ur iha númeru 1), 2), 3), artigu 54, Dekreto Governu Nú. 21/2017, 17 Maiu. CNE simu material sira munisipal, RAEOA no estranjeiru hafoin realiza apuramentu munisipal, RAEOA no estranjeiru iha 48 hóras nia laran, no realiza prosede apuramentu nasional ho durasaun tempu ka prazu máximu 72 oras hafoin simu akta sira hosi apuramentu rejional, munisipal ho estranjeiru”, dehan, Komisaria Odete Maria Belo iha Salaun Media Center CNE, 27/05.
Nia dehan, Iha apuramentu nasional, CNE prosede no konfere akta orijinal hosi sentru votasaun hamutuk 1,472 iha teritóriu nasional no diáspora, halo desizaun ba buletin votu reklamadu no reklamasaun sira ne’ebe aprezenta hosi fiskais reprezentantes partidus polítiku perante operasaun sentru votasaun ba Eleisaun Parlamentar 21 Maiu 2023 no apuramentu Munisipal, halo verifikasaun ba akta sira ne’ebé identifika akontese diskrepánsia númerika ba votu sira.
“Apuramentu nasional iha CNE hahu inisiu iha 24 fulan Maiu 2023, hodi prosede no konfere akta Apuramentu Munisipal 13 no RAEOA, inklui sentru votasaun 12 iha diáspora. Iha apuramentu nasional, CNE simu akta operasaun sentru votasaun ho rezultadu eleisaun hamutuk 1,472 aktas, ne’ebé STAE entrega ba CNE hahú iha 22 Maiu no ikus liu simu iha 25 de Maiu entrega rezultadu eleisaun sira hosi sentru votasaun diáspora mai hosi Portugal, Reuni Unidu no Irlanda do Norte”, nia salenta.
CNE simu buletin votu reklamadu sira hamutuk 515 mai hosi sentru votasaun iha teritóriu nasional inklui hosi diáspora diskrepánsia Númerika ba Votu sira: Situasaun akontese diskrepánsia númerika votu sira mai hosi akta elektroniku rezultadu apuramentu munisipal hosi munisipiu Ermera iha ida (1), no hosi Munisipiu Lautem hetan ida.
Akontese diskrepánsia refere mai hosi Munisipiu Lautem, tanba votu refere eleitór lori uma mak mai hatama iha kaixa urna laran iha momentu nia vota. Maibé, ba problema diskrepánsia ne’ebé temi CNE detekta iha sistema apuramentu nasional no fo solusaun kedas iha prosesu apuramentu refere.
CNE simu keixa no reklamasaun ne’ebé mai hosi Sentru Votasaun ho apuramentu Munisipal , rejional no diáspora hamutuk sanulu resin ida (11), maibe hosi keixa ho reklamasaun sira ne’e, hamutuk reklamasaun rua (2) mak la identifika reklamante tanba la hakerek naran tuir prosedementu normal hato’o keixa ka reklamasaun nian.
Tamba ne’e CNE la prosede keixa rua (2) ne’e. Keixa ho reklamasaun ne’ebé CNE prosede iha prosesu apuramentu nasional hamutuk sia (9), hosi númeru ne’e hamutuk keixa ha’at (4) mak iha indísiu krime. Tamba ne’e CNE sei partisipa ba Ministériu Públiku. Hamutuk keixa lima (5) mosu iha prosesu kontazen votu, hamosu buletin reklamadu no CNE prosede no deside tuir kompeténsia CNE nian atribui iha Lei ka solusiona tuir Lei haruka.
Apuramentu nasional iha CNE tuir tempu legal durante hóras hitu nolu resin rua (72) nia laran ohin tama ona ba Loron datoluk, Prazu legal tuir termu lei hateten, sei kompleta oras 72, iha 27 Maiu tuku 10:00 dader. CNE konklui prosesu sira ho konfere akta orijinal hosi sentru votasaun hamutuk 1,472 iha teritóriu nasional no diáspora. Akta hirak ne’ebe apuradu iha Apuramentu Nasional durante oras 72 nia laran, ohin atinji ona 100 %, akta ikus liu ne’ebe ohin ita insera mak akta hosi Reinu Unidu no Irlanda do Norte.
Nune’ Tuir apuramentu ne’ebe CNE halo rezultadu hatudu partidu CNRT kontinua ho 41,63%, FRETILIN 25,75%, PD ho 9,32%, KHUNTO 7,51% no PLP 5,88%