Reportajen Umbelina dos Reis
Na’in ba Kompañia Australia Regional Remote Community Services (ARRCS) hosi Northern Territory, Loretta Sheiran hateten, foin primeira vez sira halo rekrutamentu ba Timor-oan konaba programa aged care hodi hare ferik-katuas nia nesesidade bázik no halo tratamentu lor-loron nian. Vaga ne’e oinsá atu dezenvolve joven sira nia kapasidade no karakter hodi tau matan liu ba ferik-katuas sira.
Nia dehan, traballador sira ne’ebé atu ba servisu iha Austrália importante tenki hatene língua Inglés tanba komunikasaun no halo tratamentu nesesidade báziku ba haree ferik ho katuas ne’e sempre ko’alia ho lian Inglés.
“Aged Care signifika tau matan ba ferik katuas, ezemplu ferik katuas sira ne’ebé hela mesak iha uma, famíliaa sira servisu hotu, laiha ema tau matan ba ferik katuas, entaun governu Austrália tau atensaun ba problema hirak ne’e hodi fasilita traballador hodi hare ferik-katuas, hamutuk iha sentru ida hodi tau matan ba sira nia nesesidade bázika durante 24 oras.” Dehan na’in ba Kompañia ARRCS, Loretta ba Jornalista sira iha Timor Plaza, kinta-feira, 25/05.
Nia informa, traballador nia saláriu primeiru kada oras ida $24.61 to’o 26.21 dolares, depende traballador nia kualifikasaun, esperiénsia, komunikasaun entre ferik ho katuas sira. Bainhira tuir tiha treinamentu no hetan koñesimentu kle’an ona ba halo atendimentu di’ak ba ferik katuas, bele aumenta sira nia saláriu.
Nia konklui, bainhira traballador remata kontratu, sira sei halo halo observasaun, no halo relasaun di’ak no posível tinan oin sei kontinua rekruta. Hosi programa ne’e sei tuir mos treinamentu, nune’e Timor-oan fila mai Timor karik halo rasik sentru hodi aplika saida mak sira aprende no karik nafatin iha oportunidade ba Timor-oan bele kontinua servisu iha Austrália.
Total hosi kandidatu Timor-oan ne’ebé atu ba servisu iha Autrália hodi halo tratamentu nesesidade báziku ferik no katuas totál 36, area aged care hamutuk na’in 28, feto 14, mane 14, no área Hospitality hamutuk na’in 8, mane 3, no feto 5.
