Reportajen Joselina dos Santos
Sekretariu Jeral Partidu Partido Democratico (PD), António Kalohan hasoru malu ho Sekretariu Jeral Partidu Partido Congresso Nacional de Reconstrução de Timor (CNRT), Francisco Kalbuadi Lay, objetivu hosi enkontru ne’e atu halo kooperasaun koligasaun hodi forma IX Governu Konstituisional ba períodu 2023-2028. Tanba ne’e laiha dúvida katak partidu CNRT no partidu PD sei moris
Sekretáriu Jeral PD, Antonio Kalohan hatete, reprezenta Prezidente PD Assanami no estrutura hakarak mai kumprimenta karta koligasaun ba Sekretariu Jeral partidu CNRT, Francisco Kalbuadi Lay no mos hato’o parabéns ba vitória partidu CNRT alkansa ho konfiansa povu tomak nian, tuir votus validu 288.289 equivalente 41,6% ne’ebe povu depozita ba CNRT.
“Depois de ami akompaña konferensia imprensa Partidu CNRT nian ohin, nune’e Prezidente Assanami hamutuk estrutura tomak hodi delega ha’u mai atu hato’o parabens ba Prezidente CNRT Xanana Gusmão no mós ba estrutura tomak ne’ebe povu fó konfiansa. Aumezmu tempu iha oportunidade ida ne’e hato’o mós ami nia intensaun politika ne’ebé CNRT konsidera hodi forma IX governu nian,” dehan, Sekretariu Jeral Partidu Partido Democratico (PD), António Kalohan iha Salaun Sede CNRT iha Bairro dos Grilhos, Tersa 30/05.
Iha fatin hanesan, Sekretariu Jeral partidu CNRT Francisco Kalbuadi Lay hateten, CNRT iha esperansa boot ba PD atu forma hamutuk IX Governu, ne’ebé Xanana Gusmão mak sei sai Primeiru Ministru ba Governu foun periodu 2023-2028. Ho ida CNRT laiha dúvida katak partidu rua sei moris.
“Ami haksolok tebes bele relasaun di’ak hamutuk ho familia boot rua entre CNRT no PD eziste, atu iha kualifikasaun no iha esperiénsia kualifikadu. Tanba ne’e ita laiha dúvida katak partidu CNRT no partidu PD sei moris”, esplika Kalbuadi Lay.