Reportajen Silvino Freitas
Partido Congresso Nacional Reconstrução de Timor (CNRT) sei tane aas povu nia lian ne’ebé fó barak liu ba CNRT ho kadeira 31 no Partido Demokratiku (PD) kadeira 6, nune’e povu hakarak fó konfiánsa duni ba sira hala’o mudánsa ba dezenvolvimento nomós partido 2 ne’e aliadu di’ak antes ona.
Sekretariu Jerál CNRT Francisco Kabuady Lay hateten, partido tenke la’ós tuir prosedura sira hotu no dadaun ne’e prosesu ba ona iha tribunál, bainhira iha ona desizaun maka hein Prezidente bolu partido mais votadu hodi lori prosesu ne’e ba oin, nune’e bele hala’o koligasaun.
“Desizaun husi povu mak hatudu tiha ona no iha eleisaun ida ne’e iha partido 17 nune’e iha partido 5 maka hetan asentu husi 5 mós, iha partido rua mak PD ho CNRT mak aumenta votu husi kadeira 21 ba 31, no husi 5 ba 6” dehan Kalbuady liuhusi konferénsia-imprensa iha sede CNRT Bairos dos Grillos Dili, (30/05).
Nia dehan tan, lojikamente povu hakarak mudánsa ba dezenvolvimento ne’e husi partido 2 ne’e, maski iha asentu 5, maibé kadeira aumenta maka PD no CNRT, nune’e mós PD no CNRT iha aliadu ne’ebé di’ak tebes hahú husi grupu to’o iha individual nian, iha komunikasaun ne’ebé di’ak tebes.
“Menjasen povu nian ne’e klaru husi partido 5 ne’e 2 ne’e maka aumenta tanba ne’e ami konsiente no sei tane povu nia fiar, tanba ami la’ós nain maibé nain mak povu ami ne’e hanesan jestór liuhusi makina partido idaidak nian, tanba ne’e povu fó ona fiar ami sei la husik leet de’it” dehan Kalbuady.
Nia konklui katak kona-ba formasaun governu foun CNRT sei buka hodi hala’o aprosimasaun ba partido sira ne’ebé povu fó fiar iha eleisaun hodi hala’o komunikasaun liuliu ba sira nia aliadu di’ak PD, tanba kadeira 31 ne’e povu nia lian ne’ebé forsa tebes, tanba ne’e PD ema ne’ebé mesak matenek no iha respeita as ba povu nia lian.
