Reportajen Silvno Freitas
Relasiona ho problema pasaporte ne’ebé nafatin sai preokupasaun hodi impede sidadaun sira hala’o viajen ba estranjéiru, nune’e deputadu sira iha parlamentu nasionál husu atu resolve ho urjentemente tanba dadaun ne’e iha pasiénte balun ne’ebé atu ba hala’o tratementu moras maibé pasaporte laiha, nunee mós iha sidadaun balun ne’ebé pasaporte mate ema detein hela iha nasaun Korea.
Deputadu Bankada CNRT Maria Fernanda Lay hateten, problema ne’ebé sidadaun sira infrenta kona-ba pasaporte dadaun iha traballadór sira atu viajen ba estranjéiru maibé iha impedimentu ho pasaporte, nune’e problema refere nia foti iha semana hirak liu ba maibé to’o dadaun ne’e resposta laiha, tanba ne’e nia husu nafatin ba governu atu esplika kauza husi problema refere nune’e mós dadaun ne’e iha nasaun 4 mak iha ASEAN mak simu sidadaun sira ne’ebé uza pasaporte mate hodi hala’o viajen.
“Maibé nia regras mak tenke ba tau karimbu iha ministériu justisa, maibé ha’u mós la hatene validu husi karimbu refere ba tinan ida ka fulan, tanba governu la fó informasaun ne’e ba iha publiku, tanba ne’e governu tenke reposabiliza hodi foti solusaun” dehan Fernanda liuhusi intervensaun iha parlamentu nasionál, (05/06).
Fatin hanesan Deputadu husi bankada FRETILIN David Ximenes Mandati mós kestiona katak iha mós pasiente Tomas Pereira Guterres ne’ebé ho moras urjente atu hala’o tratamentu iha rai-liur maibé tanba kestaun pasaporte ne’ebé laiha entaun seida’uk bele ba hodi hala’o nia tratamentu saúde.
“Loloos karik nia sai tiha ona, tanba nia iha moras ida ne’ebé nia tenke sai urjente, maibé la’o tuun sa’e buka pasaporte laiha entaun dadaun ne’e nia hela tiha fali uma, dehan bele hetan pasaporte diplomaticu maibé ba husu iha ministro negosiu estranjeiru dehan ba ministru justisa ne’ebé dadaun ne’e ema nia oan iha de’it ona uma” dehan Mandati liuhusi nia intervensaun iha parlamentu nasionál.
Nia dehan tan katak, pasaporte sai kestaun importante tanba ne’e presiza resolve urjentemente tanba ema barak iha ospitál atu ba hala’o tratamentu iha estranjéiru maibé tanba problema pasaporte ne’ebé hala’o impedimentu.
Nune’e deputada husi bankada KHUNTO mós levanta kazu balun ne’ebé nia simu informasaun katak iha sidadaun Timoroan husi munisípiu Vikeke ne’ebé hala’o estudu iha America atu fila fali mai Timor Leste maibé hetan detein iha Korea tanba kestaun pasaporte mate, tanba problema refere husi parte familia obriga deputada Olinda atu levanta iha parlamentu nune’e estadu bele fo intervensaun ba problema ne’ebé nia oan hasoru iha Korea.
“Nia mai atu halo moris nia pasaporte hodi fila ba kontinua nia estudu doutoramentu iha America, maibé fila mai to’o iha Korea loron 3 ona ema kastigu hela iha ne’ebá, tanba ne’e ministériu kompetente tenke buka lalais solusaun” dehan Olinda iha parlamentu nasionál.
Hatan ba problema pasaporte refere Ministru Asuntu Parlamentar no Komunikasaun Sosial (MAPKOMS) Francisco Jeronimo hateten, husi parte ministeriu justisa mós informa ona iha konsellu ministru katak pasaporte ne’ebé komun ba servisu nian ne’e hotu tiha ona, maibé iha de’it maka pasaporte diplomatiku ne’ebé uza ba iha situasaun urjente liuliu ba sidadaun sira ne’ebé mak moras hodi hala’o transferénsia tratamentu urjente ba saúde nian.
“Hau hanoin komunikasaun mak seida’uk di’ak ami sei informa fali ba iha ministru sira hodi hala’o komunikasaun ne’ebé di’ak husi minstériu justisa no negosiu estranjeiru nian, tanba pasaporte diplomatika ne’e ministeriu negosiu estranjeiru mak toma konta hodi fó autorizasaun ba se mak uza, maka foin emite iha ministeriu justisa” dehan MAPCOMS Jeronimo hodi hatan ba kestaun pasaporte ne’ebé deputada sira levanta iha parlamentu nasionál.
