Reportajen Filomena da Conceição
Partidu Kongresu Nasionál de Reconstrução Timorense (CNRT) ohin mai reafirma karta husi Partidu Demokrátika (PD) ne’ebé maka haruka ba iha CNRT iha loron 30 Maiu, katak partudu CNRT prontu hala’o koligasaun ho Partidu PD hodi forma Governu dasia.
Sekretáriu Jerál partidu CNRT, Francisco Kalbuady Lay, hateten, prezensa partidu CNRT mai iha sede Partidu Demokrátika lori Maun boot Kay Rala Xanana Gusmão nia naran hanesan Prezidente do Partidu ho estrutura tomak mai to’o iha sede PD, atu hato’o CNRT nia felisitasaun no kongratula ba partidu Demokrátika ne’ebé mak foin da dadauk liu ba hetan aseitasaun no hetan kadeira 6 signifika aumenta tan kadeira ida, i mesmo tempu komprimisaun sekretáriu Jerál PD ho estrutura tomak. No CNRT mai iha ne’e atu reafirma ho karta ne’ebé mak iha dia 30/05 ne’ebé sekretáriu Jerál PD loro ba iha sede CNRT katak CNRT prontu hamutuk PD hodi Servi ba povu no rai ida ne’e.
“Partidu rua ne’ebé mak hetan fiar husi povu, no ohin lokraik ami mai reafirma katak partidu CNRT Prontu halo koligasaun ho Partidu Demokrátika e karta ofisiál ami entrega ona ne’ebé mak asina husi Presidente do Partidu maun boot Kay Rala Xanana Gusmao ho ha’u ata hanesan sekretáriu Jerál partidu. Klaru ke partidu rua ne’e agora sai ida deit atu prontu hamutuk servi ba povu ho rai ida ne’e,” dehan Kalbuady ba jornalista sira, iha Sede Partidu Demokrátika kolmera Dili, Segunda 05/06.
Nia haktuir, Partidu CNRT ho PD la haluha mós kongratula ba partidu 15 ne’ebé mak partisipa ona iha eleisaun Parlamentár, ba plata forma no mós ba partidu 12 ne’ebé mak la hetan asentu, maibé festa demokrasia ida ne’e dala ida tan povu Timor, lider polítiku sira hotu hatudu ba mundu katak Timoroan sira hotu hadomi duni sira-nia rai nune’e, eleisaun ne’e la’o ho diak teb-tebes, ho nune’e kongratula mós ba partidu rua nia milititantes no simpatizantes sira no estrutura tomak iha Timor.
Iha Fatin hanesan sekretáriu jerál partidu Demokrátika António da Conceicao Kalohan hateten, sekretáriu jerál partidu CNRT halo reafirmasaun do komprimisiu ne’ebé maka partidu rua ne’e iha kampaña hato’o katak partidu rua nee hakarak hotu ba mudansa ida-idak, ne’ebé la’o iha periodu do kampaña maibé ikus mai hasoru malu tanba objetivu ida mudansa i mundansa ida mak ohin konkretiza ho vizita ofisiál husi partidu CNRT.
“Primeira vizita do lider partidu mai sede partidu Demokrátika ninia tanba ne’e mak ohin hanesan reafirmasaun ida ba partidu rua ne’e atu hahú fila fali komprimisiu anterior, re inkontru de 2007 nian mak ohin hahú fila fali atu hala’o iha 2023.” Dehan Kalohan
