Reportajen Silvino Freitas
Komisaun Funsaun Públika (KFP) hato’o relatóriu annual tinan 2022 ba parlamentu nasionál, nune’e tuir relatóriu ne’e kompoin rezumu atividade 4, inklui ezekusaun orsamentu no númeru funsionáriu rejiztadu tinan 2022 hamutuk 36,557 inklui ho ajente administrasaun públika (AAP).
Tuir Prezidente KFP Faustino Cardoso haktuir, iha relatóriu ne’ebé aprezenta ba parlamentu nasionál maka kona-ba rezumu jerál relatóriu anual tinan fiskál 2022, prioridade sira ne’ebé defini tiha ona husi komisaun funsaun públika nian ba mandatu datoluk ne’ebé konsege alkansa ba mandatu liga ho implementasaun atividade sira husi planu estratéjia KFP ba periodu 2015-2030 ne’ebé hanesan baze hodi hamosu planu asaun anual 2022 nian, tuir mai maka koalia kona-ba situasaun komisaun funsaun públika halo analiza global kona-ba administrasaun públiku inklui mós rezultadu monitorizasaun husi ekipa téknika sira ba iha situation funsaun públika iha nivel nasionál no munisipál sira no ikus liu husi relatóriu ne’e maka ko’alia kona-ba oportunidade dezafiu no estratejia sira taka ho konkluzaun no kompleta ho aneksu sira.
“Iha pontu prinsipál sira maka hahú kedas iha alokasaun no ezekusaun orsamentu jerál ba KFP nian, iha tinan 2022 KFP hetan alokasaun orsamentu ho totál $2,782,071, ne’ebé distribui ba kategoria 3 maka saláriu vensimentu 57,3% ho osan 1,591,331.00 hodi finansia ba saláriu Funsionáriu no ajente administrasaun públiku iha KFP, ba fali iha bens no servisu ho 42,2% osan $1,177,840.00 iha tranferénsia nian maka 0,5% osan $12,900.00 hodi hatan ba iha rekooperasaun ekonomia husi verba dotasaun governo nian” dehan Faustino liuhusi aprezentasaun iha Parlamento Nasionál, (06/06).
Tuir nia, husi orsamentu ne’e KFP konsege ezekuta 87% husi totál orsamentu ne’ebé aloka mai iha KFP bainhira hala’o komparasaun ho ezekusaun iha tinan 2021 nian ho 72% husi orsamentu $3,175,411.00, nune’e tinan 2022 ezekusaun boot liu no mós prosesu ezekusaun iha tinan 2022 kabe ba iha planu no programa prinsipál 2 boa governasaun no jestaun institutional ho Igualdade jéneru no inkluzaun sosiál, nune’e mós iha sub programa 8 no atividade hamutuk 24 iha planu asaun annual KFP 2022 nian.
“Hau tenta atualiza kona-ba situasaun KFP tinan 2022 nian iha fim do ano haktuir ba dadus SIGAP foun CFP rejista funsionáriu permanente inklui ajente administrasaun públika ho totál 36,557 kompostu husi feto 12,942 no mane 23,615 tuir rejimi juridiku empregu iha KFP, iha rejimi kareira prinsipál 2 maka rejimi jerál ho totál 20,716 no rejimi espesiál ne’ebé kompeon númeru forsa traballu ho 15,841” dehan Faustino.
Nia konklui katak, iha distribution kargu diresaun no xefia nian to’o tinan 2022 nia rohan rejista numeiru okupante ba kargu husi rejimi jerál no espesiál iha administrasaun hamutuk 3,913 kompostu husi feto 840 no mane 3,073, nune’e husi numeiru kargu refere seida’uk inklui kargu sira ne’ebé iha MEJD liuliu eskola bazika no sekundária sira ne’ebé dadaun ne’e rejista purvolta 300 no iha eskola ida iha kargu 3 aumenta tan eskola filiál sira ne’ebé rejista iha 1,480 no eskola filiál ida iha kargu ida koordenadór ida karik aumenta ho totál hotu iha MEJD de’it puvolta 2,580 kargu diresaun xefia.
