Reportajen Silvino Freitas
Estadu liuhusi Sekretáriu Estadu Formasaun Profisionál no Empregu (SEFOPE) husu ba família sira iha Timor-Leste labele lori problema no husu osan beibeik ba oan sira ne’ebé servisu iha Korea do Sul, tanba servisu balun ne’ebé sira hala’o iha risku bo’ot ba sira nia vida, nune’e presiza husu orasaun no matebian sira nia tulun atu fó matak-malirin ba sira, hodi hala’o sira nia servisu di’ak no mós bele produz mos osan barak.
SEFOPE Alarico do Rosario hateten, husu ba inan-aman, ferik-oan no doben sira atu komprende alin traballadór sira ne’ebé atu ba servisu iha Korea do Sul, tanba sira servisu hanesan atan família sira hela iha Timor Leste han hanesan liurai.
“Ha’u ko’alia hau haree ho matan, ohin mister Lyn hateten sira ne’ebé servisu iha area peska servisu ida risku tebes, karik husi ne’e mak imi provoka sira kuandu sira ho mentalidade ladi’ak ho emosionál buat ruma bele akontese, tanba servisu iha tasi la’ós iha rai-maran” Alarico rekomenda bainhira hala’o despedida ba traballadór sira iha Timor-Lodge Komoro, (08/06).
Nia dehan tan, iha mós traballadór Timoroan ne’ebé monu lakon iha tasi to’o dadaun ne’e buka la hetan, ne’e tanba tasi maka risku liu, tanba tasi iha Korea do Sul kle’an liu tasi iha Timor Leste, nune’e família sira labele telefone hela de’it hodi husu osan kuandu nia trauma ho ida husu osan, nune’e hala’o servisu la kontente la kontrola nia an buat ruma ne’ebé ita espéra bele akontese ba nia vida.
“Hau hanesan imi nia alin, imi nia maun, imi nia maluk ida, fó hanoin imi atu kuidadu sira, tanba sira servisu iha fatin ida ne’ebé risku lahalimar, imi hakarak hatene dader tuku 1 no 2 sira iha tiha ona tasi laran, tuku 4 no 5 sira lori ikan tama iha tasi ninin, nune’e ikan sira espalla hotu ona mak tuku 7 foin ba deskansa hodi kore no hamoos redi, hala’o servisu ne’ebé patraun haruka” dehan SEFOPE Alarico.
Nia dehan tan, ho situasaun sira ne’e hotu tanba akontese timoroan nain hira ne’ebé hetan asidente iha Korea do Sul, tanba balun família mak ejiji hela de’it, traballadór ida husi Ermera tara-an tanba familia mak husu osan lorloron, labele akontese buat ida hanesan nee inan-aman kuandu hakarak halo lia buka rasik, labele garante oan ne’ebé ba servisu iha Korea do Sul, labele husu osan lorloron hodi halo ba lia-mate no lia-moris, oinsá mak nia bele moris ba iha futuru ne’e atu la’o oinsá.
Fatin hanesan Diretor Nasionál Emprego Exteriór (DNEE) Filomeno Soares hateten, baibain ita asisti iha Korea do Sul, balun lakon vida iha servisu fatin, lakon vida tanba asidente, balun tara-an no balun mós sai bulak, buat sira ne’e mak sei akontese iha ne’ebá, labele hanoin katak programa ne’e la’o ne’ebé di’ak de’it, buat at mós mosu iha ne’ebá, tanba ne’e estadu husu ba familia nia apoiu maka orasaun, uma-lisan, matebian no missa, nune’e bele lori matak malirin ba sira atu bele produz osan barak hodi lori ba família sira.
“Lalika lori problema ba sira tanba sira, dadaun ne’e sira moris ne’e depedente mai ita kuandu sira prezensa iha ita nia le’et, mais dadaun ne’e sira atu ba servisu iha rai-liur sira indepedente totál, sira moras mós sira mak husu ba sira nia an rasik, sira la han mós sira husu rasik ba sira nia an, sira atu ba ne’ebé mós liha ema ida kontola sira, nune’e sira nain rasik mak bele domina sira nia an, ami halo preparasaun hotu maibé ne’e mós sei la to’o tanba ne’e ami husu ba família hotu atu bele apoiu morál no korajen ba sira” konklui Diretor Filomeno.