Reportajen Silvino Freitas
Estrutura no kuadru partido Frente Revolusionário Timor Leste Independente (FRETILIN) munisípiu Dili respeita no hakruuk ba rezultadu eleisaun ne’ebé FRETILIN hetan tanba tuir dalan no prinsípiu demokrasia, nune’e sira nafatin fó konfiánsa ba lideránsa Troika atu lidéra partido nomós respeita rezultadu V kongresu no konferénsia nasionál nomós derota ne’ebé partido simu ne’e responsabilidade koletivu.
Koordenadór FRETILIN Munisípiu Dili Antonio Moniz Calau hateten, kuadru FRETILIN nian iha munisípiu Dili fiel de’it ba prinsípiu sira hodi defende hodi konsolida estadu de direitu demokratiku ho soberanu ne’ebé livre no independente tuir votante sira nian, nune’e sira kogratula votante hotu espesiálmente ba munisípiu Dili, ne’ebé partisipa ativu iha eleisaun parlamentár iha loron 21 maiu tinan 2023, nune’e mós rezultadu eleisaun ne’ebé FRETILIN hetan ne’e nu’udar servisu koletivu interna partidu nian.
“Kuadru hotu iha munisípiu Dili komunga prinsípiu ida ne’ebé defende natureza demokrasia internál no rekuza hahalok ne’e la halo tuir ka la kumpre estatuto regulamentu interna partido nian, no desizaun ne’ebé partido desidi tuir orgaun partido nian” dehan koordenadór FRETILIN Munisípiu Dili, liuhusi konferénsia imprensa ne’ebé hala’o CCF Dili, (13/06).
Nia dehan tan, estrutura no militante munisípiu Dili fó konfiansa tomak ba lideránsa troika atu solidu no dialogu permanente hodi dirije no orienta FRETILIN la’o ba oin, nomós promove rekonsiliasaun interna hodi halibur kuadru sira hahú husi 1975 to’o dadaun ne’e, estrutura no militante munisípiu Dili tenke respeita rezultadu husi kintu kongresu no konferénsia nasionál FRETILIN nian hodi rezolve dezentendimentu partido nian husi dialogu no estrutura formál.
“Apela ba estrutura no militante munisípiu Dili hato’o lamentasaun no insatisfasaun rezultadu eleisaun liuhusi makina partido no promove dialogu ho lideránsa troika hodi rezolve problema partido nian iha nia fatin la’ós halo deklarasaun iha média sosiál” dehan Antonio.
Antonio konklui katak, grupu no kamarada sira ne’ebé hanaran nia an dinamizadór husi konferénsia imprensa refere la konfronta kamarada sira ne’ebé hala’o konferénsia imprensa iha loron hirak liu ba, maibé sira bolu atensaun ba militante hotu atu respeita estatuto partido nian respeita kultura dialogu no respeita lideránsa sira, nune’e kona-ba derota partido nian iha eleisaun parlamentár ne’e responsabilidade koletiva husi estrutura nasionál, munisipál to’o suku tomak ne’ebé ho esforsu no servisu masimu ba partido.