Reportajen Silvino da Costa
Parlamentu Nasionál liuhusi plenaria segunda feira loron 26 Junu hala’o sesaun votasaun, hodi kompleta kompozisaun meja parlamentár ne’ebé maioria lidéra husi feto no mane nain ida, nune’e votasaun ne’e ho lista kandidatu ne’ebé unika ho votus afavor 43, abstensaun 20, nulu 1 totál 64 votus, ida foti boletín maibé la vota.
Nune’e prezidente parlamentu nasionál maka Maria Fernanda Lay husi CNRT, vise-prezidente lidéra husi Maria Teresinha da Silva Viegas nu’udar Vise-Primeira husi CNRT, Alexandrinho Afonso Nunes nu’udar Vise-Segundu husi PD, nomós iha sekretária meza lidéra husi Virginha Ana Belo husi CNRT, vise-sekretária maka Maria Teresa da Silva Gusmão husi PD, Vise-Segundu maka Bendita Moniz Magno husi CNRT, nune’e husi kompozisaun ne’e maioria husi partido CNRT.
Prezidente Parlamentu Nasionál, Maria Fernanda Lay liuhusi entrevista hateten, nu’udar prezidente sei hala’o kna’ar hanesan prezidente tuir rejimentu haruka maibé iha meja ne’ebé presiza apoiu atu bele hala’o kna’ar di’ak liu tan nomós fahe servisu ne’ebé hanesan ho normalmente, kompozisaun hirak ne’e koajuva husi kna’ar ne’ebé nia bele hala’o nune’e mós kna’ar ne’ebé nia bele fahe ba sira.
“Ha’u nia vise mane ida ne’ebé mais bonitu ne’ebé ha’u éspera kompozisaun meja marka istória iha Timor Leste, maibé ida importante liu maka produtividade ami nian ne’e mak importante liu” dehan PPN Fernanda Lay ba jornalista sira iha resintu PN, (26/06).
Nia dehan, komisaun espesializada sira prepara ona nune’e ohin nia husu urjente ba bankada sira hotu atu kompoen sira nia prezidente no vise atu bele iha enkontru ba ajenda tuir mai tanba iha deliberasoen ne’ebé sei hala’o no enkontru lideres bankada atu desidi, nune’e kada komisaun sei hili nia prezidente no sekretáriu maibé kompozisaun númeru deputadu prepara hotu ona no to’o dadaun ne’e sei susar uituan atu diminui ka aumenta tanba sei iha balansu ba reprezentante deputadu iha kada komisaun nune’e bele hala’o atividade, husi bankada ki’ik sira tenke fahe ho didi’ak atu bele hala’o papél ho interesadu no labele iha fatin ida de’it no labele bankada bo’ot sira mak prejudikadu.
“Maibé ida ne’e sei hato’o iha lideres bankada no lideres bankada mak sei mai hala’o votasaun iha plenaria” dehan PPN.
Nia konklui, deputadu sira ne’ebé atu hala’o nia kna’ar balun laiha viaturas nune’e uluk iha segunda, terseira no kuarta lejislatura mós sira enfrenta, nia fiar katak deputadu sira bele fó fila karik labele sosa entaun tenke iha karreta, nune’e mós seida’uk iha konfirmasaun karreta hira mak entrega no hira mak seida’uk.